Her roje zîndananê Kurdistan û yê Tirkîya de xeberê zext, teda û îşkenceyî yenî. Nê zîndanan ra yewe zî Zîndanê Tîpa Tyî yê Tarsusî yo.
Bi nameyê Ahmet Sertî de kesêk 15 aşmî verê bi îdîaya ‘endamê rêxistine bîyayene’ ra amebî tepiştiş û 15 aşmî ra dima tehlîye bî. Sertî zext û tedayê zîndanan de estî ser o qisey kerd. Seke yeno zanayîş Sert 16ê tebaxe de Eskîşehîr de amebî tepiştiş û dima ra tewqîf bîbî. 2 aşmî ra dima Zîndanê Eskîşehîrî ra sewqê Zîndanê Îskenderunî bî.
Sertî va ‘ez raştê payan ser de hûmare dayîşî ameya’ û wina dewam kerd: “Mi ra vatî; ma tîya de 2 rojî tena to vindarnenî. Labelê ez qasê hewteyêk tena hucre de menda. Dima ra mi berdî Zîndanê Îskenderunî. Gardîyanan tedaya psîkolojîke ma ser de kerdêne û nîzamo leşkerî ma ser de ferz kerdêne. Gardîyanan eştêne koguşan ser de û kitab û cilanê ma vila kerdênê. Zîndanê ma mîyanê gemarî de bî, awe nêameyêne şimitiş. Teber ra kitabî nêameyênê girewtiş. Ge-ge zî polîsî ameyêne zîndan de embazanê ma muhakeme kerdênê.”
Sertî dewamê qiseykerdişê xo de wina va: “Badê ke ez 7 aşmî tîya de menda, mi û 7 hepsîyanê bînan erşawitî Zîndanê Tarsusî. Kewtişê zîndanî de sehnayîşê rûtî ma ser de ferz kerdî. Seba ke ma qebul nêkerd, ma ameyî derbkerdiş. Bi zorî cilê ma vetî û ma derb kerdî. No çîyêko huqûqî nîyo. Gardîyanan ma ra va ‘Tîya Tarsus o, nêmaneno sewbîna cayî. Dima ra ma dekerdî hucreyanê yew kesan. Wexto ke ez zîndan ra vejîyaya, mudurî mi ra va ‘ti aqil bîyî? Ti do destek bidî PKKyî?’.”
NAVENDÊ XEBERAN