Kaybazê Tîyatroyê Bajarî yê Amedî Mehmet Emîn Yalçinkayayo ke demêko derg bi ke Îzmîr de tedawî dîyêne, wefat kerd. Seba Yalçinkayayî Tîyatroyê Bajarî yê Amedî de merasîmêk ameye viraştene. Rojnameger, hunermend, tîyatrovan, sîyasetmedar û xeylê kesî beşdarê merasîme bîyî.
Kaybaza tîyatroyî Berfîn Emektare merasîme de qisey kerde û wina va: “Ma do qet embazê xo Yalçinkayî xo vîra nêkerî.” Dima ra Parlamenterê HDPyî yê Amedî Selçuk Mizrakliyî va ‘ê gêrayoxê heqîqeta hunerî yî’ û wina domna: “Ma yê ke tîya de ma hepis kerdî lanet kenî. Emînî nêyî heq nêkerdbî. Ma tîya de soz danî ey. Ma do gêrayîşê xo yê heqîqete bidomnî.”
Dima ra cenaze bi ambulanse berdî Goristanê Yenîkoyî û tîya de ameye defin kerdene. Definbîyayîşê cenaze ra dima qurnefîl û vilikî ronîyayî ser mezelê Yalçinkayayî ser. Hunermend Şêrko Kanîwarî dîyar kerd ke Mehmet Emînî înan ra vato ‘Eke ez bimira, qurnefîl û vilikan bironê mezelê mi ser o’. Tazîye do Keyeyê Tazîye yê Şaklatî de ame ronayene.
ANF / AMED