3ê Tebaxa 2014î de çeteyanê DAÎŞî hêrişê Şengalî kerdbî û bi hezaran cinî, doman û merdimê sîvîlî qetil kerdî û hendêna cinîyî zî remnayî. Hêrişan ver bi hezaran kesî mecbûr mendî ke ca û warê xo verdî û şêrî cayanê bînan de bica bibê.
Koordînasyonê Têgêrayîşê Cinîyan ê Kurdan ê Fransa (TJK-F) derheqê hêrişê qirkerdişî yê çeteyanê DAÎŞî yê vera Şengalî de eşkerayîyêk daye û semedê tewrbîyayîşê çalakîyanê 3ê Tebaxe veng da. TJK-Fyî vist vîrî ke çeteyanê DAÎŞî 3ê Tebaxa 2014 de hêrişê bajarê Şengalî yê Başûrê Kurdistanî kerd, bi hezaran doman, cinî û merdimê sivîlî qetil kerdî û bi hezaran cinîyê Êzidîyî hetê çeteyan ra ameyî remnayene û dereceya koleyanê cinsîyan de îşkence înan rê ame kerdene.
TJK-Fyî eşkerayî de wina va: “Keyeyê bidejî a roje ra nata domanê înan ke çar hetanê dinya rê vila bîyî, gêrênê înan, hema kenê ke birînanê xo bipêşî. Qirkerdişo ke verê heme dinya de ame kerdene ganî vera ci de na bêvengîye bêro xeripnayene ke bi hezaran cinîyê ke destê çeteyan de yê bêrê xelisnayene.”
Koordînasyonî da zanayene ke çarçeweya çalakîyan de 3ê Tebaxe saete 11.00 de seba vîrardişê cinîyanê ke hetê çeteyanê DAÎŞî ra Şengal de ameyê qetilkerdene û ameyê remnayene, aktîvîteya deqeyêk hurmetgirewtişî bêro kerdene û semedê tewrbîyayîşê çalakîyan veng da cinîyan.
PARÎS