Sûka Kanada Toronto de qurbanîyê Tertelê Dersim bi merasîmeke amey vîrarden.
Seba bi des hezaran kesê ke netîceyê Tertelê 1937-38î de weşîya xo kerdî vinî, bi merasîman yenê yadkerden. Sûka Kanada Toronto de zî bi wesîleyê serragêra 80. yê Tertelê merasîm virazîya. Vindertişê hurmetî ra dima, Cîhan Sonmezî qisey kerd û vist vîrî ke Qirkerdişê 1937-38 yê Dersim bi fermanê Mistefa Kemal dest pêkerd. Sonmezî ard ziwan ke hona zî her hetê qirkerdişî nêvejyayê orte û waşt ke cayê cenazeyanê Seyîd Riza û alwozanê ci ke amey dardekerdiş, bîrê dîyarkerden.
Qiseyan ra dima merasîm bi wendişê şîîranê ser Dersim û damûsnayîşê sînevîzyoneke dewam kerd. Tewr pîy de zî Ahmet Îhvan vejyay ser sehne, lorik û klamanê xo seba qirkerdişî ard ziwan.
TORONTO