3ê Adare de seatanê sodir de komê bi tifingî ke girêdayê PDK yê û hetê Tirkîye amey perwerde kerdiş hêrîşê herema Xanesor ê Şengal kerdî. Dima ra vejya teber ke zerreyê nê koman de endamê Rêxistina Îstîxbarata Millî (MÎT) yê Tirkîye zî estê. Parlementera HDP Feleknas Ûca, na babet kirêşna meclîsê Tirkîye û seba ke Wezîrê Karê Zerrîn ê Tirk Suleyman Soylû cewab bido vernîyazpers da.
Komê ke 500 kesanê bi tifingî ra ca amê û yê ke xo zey ‘pêşmergeyê rojava’ biname kerdî 3ê Adare de hêrişê sûkeka Şengal Xanesor kerdî û waştî bikerê herêmanê YBŞ. Rîwalo ke endamanê YBŞ destûr nêdayî ravêrdişê na komî pirodayişî vejyay. Fermandarîya YBŞ pirodayîşan ra dima îzahatekê da û aşkere kerd ke nê hêrişî bi îtîfaqê PDK-AKP de virazîyenê û zerreyê çeteyanê hêrîşkar de endamê îstîxbarata Tirkîye zî estê.
Na îzahatî ra dima Parlementera HDP yê Amedî Feleknas Ûca bi vernîyazpersekî na babed kirêşna rojdema meclîsî. Ûca Wezîrê Karê Zerrîn ê Tirk Suleyman Soylû rê enê persan kerd:
Quwetê Zomar kamî yê?
* Hêrîşanê 3'ê Adara 2017’an de, ke vera sûkeka Êzidiyan Xanesora Şengalî amey kerdiş, raşt o ke 21 endamê Rêxistina Îstîxbarata Millî zî mîyan de bî? Eke na îdîa raşt bo, çend endamê MÎT’î tewrê nê hêrîşî bîye?
* Nê endamê MÎT’î yê ke yeno îdîakerdiş ke tewrê hêrîşan bîye, raşt o ke endamê koma bi nameyê Quwetê Zomar ê?
* Mavêna na koma bi tifingî ya bi nameyê Quwetê Zomar û MÎT’î de eleqeyekê (têkilî) seyî esta?
* Quwetê Zomar kamî ra virazîyenê? Raşt o ke zerreyê Quwetê Zomar de endamê MÎT’î estê?
* Raşt o ke koma çekdar ya bi nameyê Quwetê Zomarî hetê Quwetanê Bi tifingî ê Tirk (TSK) û Rêxistina Îstîxbarata Millî ra ameyê perwerdekerdiş?
* Eke nê îdîayî raşt bê, Quwetê Zomarî çiwext û kotî de ronîyayê? Quwetê Zomar bi kamcî armancî amê ronayen?
* Eke raşt o ke komê bi tifingî yê binameyê Quwetê Zomar dewa Eyn El Fîras ê Mûsil de ca bîye, o wext armancê bicabîyayîşê înan çiçî yo?
* Kamî qerar da ke koma bi nameyê Quwetê Zomar ke yeno vaten 21 endamê MÎTî zî mîyan de yê, hêrîşê sûkeka Xanesora Şengalî bikerê?
ANF/ENQERA