Serre 2004, 21ê asma payîza wertî de Qoser de lazeko 12 serren Uğur Kaymaz hetê eskeranê tirkî ra ame qersune kerdene.
12 serren Uğur tam ebi 13 qersunan kişiya.
Waxtê kamij hukumatî de bî?
AKaPe serdest biye, hukumat de biye. Sermiyan Erdoğan o.
Sere 2009, 28ê asma payîza virene de Lîce de çeneka 14 serrene Ceylan Önkol hetê eskeranê tirkî ra amê kistene.
Ceylana14 serrene ebi jû rakete kerde pirtleyî. Tabî eskeranê tirkî.
Waxtê kamij hukumatî de bî?
AKaPe serdest biye, hukumat de biye. Sermiyan Erdoğan o.
Çi xerîb!
O waxt hukumtê AKaPe ‘wastenê’ mesela en girse yê Tirkan ‘halbikero.’
Waxtê ‘kürt açılımı’ yê AKaPe bî. AKaPe bi na ‘açılım’ domonanê kurdî rê merdene ardenê.  Halkerdena mesela de niya niyadenê.
Endî dewrê qersune vêrdî bî ra, dewrê raketan ame bî.
Bi hezaran domonê kurdî erjiyayî hepis, cirê ejat bî, bojiyê xo verê kamera de tadiyayî.
Garana polîsanê tirkî jû domono kurd guretenê wertê xo cirê verê kamera de ejat kerdenê.
Dem, demê AKaPe bî, sermiyan Erdoğan bî. Demê zulm û zorvajiye bî.
Serre 2011, 28ê asma payîza peyene Roboskî de leto jede domonî, tam 34 mordemî hetê teyaranê tirkî ra ameyî qirkerdene.
Waxtê kamij hukumatî de bî?
AKaPe serdest biye, hukumat de biye. Sermiyan Erdogan o.
Çi xerîb!
2 rojî na biyayîs ra tepiya rîwale serra newiye ra qomê tirkî her ca de keyf û kelebut kerdenê. Birayiya xo niya ardenê ra zon.
Di asmî tertelê Roboskî ra tepiya Emîne Erdoğan Xanime sona Roboskî û bervena.
Îman bikerîme?
Nî rozanê peyenan de biyayîsê hepisxanê Pozanti vejayî werte. Bî eskera ke bi destura memuranê hepisxanî domonanê kurdî rê tecawuz û ejat biyo.
Waxtê kamij hukumatî de bî?
AKaPe serdest biye, hukumat de biye. Sermiyan Erdoğan o.
Çi xerîb!
Huklumatî domonî nejdiyê ma û pî ra guretî, surginê hepisxanê Sîncanî kerdî.
Qeyta jû dem de domonanê kurdî rê hond zulm nêbî.
Lazeko ke bi name T.T na murdariya hepisxanê Pozanti sero rojnamande qesey kerd, rîwalê ‘propaganda seweta rêxistina terorîste ra’ erjiya hepis, tecawuzkar û memurî serbest fetelînê.
De bê ke heştiranê serdestan rê îman bike!