Fermandarê Hêzê Azadî yo Pêrabeste (BOG) û Partîya Komunarê Şorişgerî (DKP) Ulaş Bayraktaroglu 9ê Gulane de Reqqa de Hemleya Xezebê Firatî de resa şehadet. TKP/ML TÎKKO Û MLKPyî derheqê Serfermandarê DKP û BOGî Ulaş Bayraktarogluyî de îzehetê nuştekî dayî. Fermandarîya Rojawanî ya TKP/ML TÎKKOye îzehetê xo de vato ‘ma do bi tesilî heskerdiş û bêrîkerdişê Bayraktarogluyî yê şorişî bîyarî ca û îzehet wina dewam kerdo: “Bayraktaroglu ruhê serewedarkar yê Gezî yo.”
Ma do bîyarî ca
Fermandarîye dewamê îzehetî de wina vato: “O seba fermandarî û rayberîye çi lazim bibo, kerd. O fermandaro ke cayo ke o bi xo nêşînê, şerwanê xo zî nêerşawitêne. Embaz Ulaş heme wextê xo seba dişmenî ra hesabperskerdişî derbaz kerdêne û hedefê xo ser o kilît bîbî. Vindîbîyayîşê girdî mîyanê xo de qezencanê girdan hewênenî. Ma do kerb û kînê Bayraktarogluyî vera faşîzmî de nîşan bidî. Ma do bêrîkerdişê ci yê seba serkewtişî bîyarî ca.”
Tim vernî de bî
MLKP Rojawanî zî îzehetê xo de va ‘wexto ke hemleya Reqqa dest pêkerde, embazê ma Ulaş Bayraktaroglu tewr vernî ya hemle de cayê xo girewt û bî bêmerd. Embazê ma bi hawayo rew şehîd kewt û ma seba DKP û BOG û keyeyê ci serweşî wazenî. Ma bi rêzdarî vera fikir û vîrardişanê ci de milê xo çewt kenî. Hem cepheyê Tirkîya de û hem zî cepheyê Rojawanî de ma vera dişmenanê ortaxan de seba şarê xo têkoşîn da. Cok ra şehadetê ci seba tevgerê ma vîndîbîyayîşêko gird o.” MLKP Rojawanî dewamê îzehetê xo de wina vato: “Ma bawer kenî ke do têkoşînê ma yo şorişger sey Ulaş Bayraktarogluyo ke nameyê xo Ulaş Bardakçiyan ra gêno, sey înan do şorişgeranê ciwanan vejo û xeyal û waştişanê înan bîyaro ca. Têkoşînê ma yê azadî û rûmetî ke ma Kobanê ra heta Minbic, Girê Sipî ra heta Reqqa ma bi pêrodayîş qezenç kerdo, do hîna zaf gird bibo. Adirê şorişî ke Rojawanî ra berz beno, do tesîrê xo heme cayanê welatî de bido hîskerdiş.”
ANF/BRUKSEL