Seba unîversîteyanê Rojawan û Kobanê yê Vakur û Rojhelatê Sûrîye de termînê qeydê serra newî ya perwerde û banderîye dest pêkerd. Karê qeydkerdişî do heta 5ê Teşrîna Verêne dewam bikerê û muracatê emserî goreyê serranê bînan zêdeyêr ê.
Serranê vîryarteyan de rixmê şert û mercanê şer û tehdîtanê herême zî Vakur û Rojhelatê Sûrîye de perwerde nêame vindetene û serkewtişê girdî ameyî qezençkerdene. Dimayê şorişê 19ê Temmuza 2012î pê asta dibistana ewile, mîyanên û lîse perwerde bêmabên pê 3 ziwanan dewam kerd. Rojawan de ke naye ra verî unîversîte çinêbi, serra 2015î de Unîversîteya Efrînî, 2016 de ê Rojawanî û 2017 de Unîversîteya Kobanê awan bîyî.
Derheqê qeydanê unîversîte de Hemsereka Beşê Zanistê Fenî yê Unîversîteya Kobanê Sakîne Elî muxabîrê ANFyî Ersîn Çaksû rê qisey kerde û va ‘qeydê newî mabênê 10ê Êlule û 5ê Teşrîna Verêne de do dewam bikerê’ û wina dewam kerde: “Di unîversîte zî emser pê sîstemê qeydo merkezî wendekaran qebul kenî. Unîversîteya Kobanê de beşê Ziwan û Edebîyatê Kurdkî, Laboratuvarê Tibbî, Matematîk, Fizîk, Kîmya û Bîyolojîyî estê. Unîversîteya Rojawan de zî nê beşî estê: Matematîk, Fizîk, Kîmya, Tarîx, Cografya, Mamostatî, Hunerê Weşî, Jineolojî, Edebîyat, Muhendisîya Petrolî, Muhendisîya Petro-Kîmya, Muhendisîya Sazkerdişê Ekolojîk, Mekanîk, Açarnayîşê Îngilîzkî û Muhendisîya Înşeatî.”
KOBANÊ