HAMZA GUNDUZ / MA / COLEMÊRG
Colemêrg de bi ameyîşê payîzî, dewijan dest bi amadekarîya zimistanî kenî. Dewijê ke heywanan miqate kenî, vaşo ke hamnanî merg û zozanan ra çînabi, nika zî kirişenî dewan. Dewijanê ke verê cû vaşî çînabi û ewja de pêsernabî, nika zî bi wesayîtan kirişenî dewan.
Dewijan wextanê verênan de xeylê zehmetîyan reyde nê vaşan kiriştêne, labelê nika bi wesayîtanê xo ê rayîranê zehmetinan ra derbas kenî û benî dewe. Nê dewan ra yewe zî dewa Bayê ya Colemêrgî ya. Bi nameyê Naîf Beyterî de dewijî va ‘dewan de merdimê ma debara xo bi miqatekerdişê heywanan kenî’ û wina dewam kerd: “Na herême de merdim ancax eşkeno bi heywanan debara xo bikero. Ez hem karê xo kena û hem zî hetkarîya dewijan kena.”
Beyterî dewamê qiseykerdişê xo de wina va: “Ma verê cû bi rojan vaşan çînenî û nê vaşan heta rayîrê wesayîtî kirişenî. Heta ke varayîşî dest pênêkerdî, ganî ma vaşan bikirêşî dewe. Ma verê cû vaşanê xo bi kaşane (xizag) antêne dewe. O wext wesayît çinêbî û zehmetîyî zaf bîy. Ma bi kaşane şênayne yew reyde 20 baxan bikirêşî, labelê ma nika bi wesayîtî 250 bax eşkenî bîşêrî.”