Badê ke pêşnîyazê bedilnayîşê qanûno bingeyî Meclîs ra derbaz bî û erşawîya Serokkomarî ver, nika Tirkîya de amadekarîya referandûmî yeno kerdiş. Heta nika heme partîyê fikrê xo yê referandûmî aşkere kerdî. Verfekê hukmatî û hetkarê Serekwezîrê Tirkîya Numan Kurtulmuşî çend rojî verê cû wexto ke îzehet dayêne çapemenî, seba referandûmî wina vatêne: “Ma bawer kenî ke no peşnîyaz do referandûmî de bêro qebulkerdiş. Eke netîceyê referandûmî de bêro qebulkerdiş, o wext do vengê rêxistinanê teroran bibirîyo, eke wina nêbo beno ke bombeyî biteqyî û merdimî bi suîkastan bêrî kiştiş.” Kurtulmuşî bi hawayo aşkere şarî tehdît kerd. Merdim eşkeno vajo ke no eynî wextî de îtîrafkerdişêk o. Yanî nê hêrişê ke yenî kerdiş, bi destê hukmatî yan zî çarçeweya zanayîşê hukmatî de benî, no îzehet zî îtîrafê ci yo. Xora no îzehetê tehdîtî yê sifteyîn nîyo; yeno zanayîş ke wexto ke hukmatî netîceyê weçînayîşê 7ê hezîrane nêecibnabî û qerarê weçînayîşî girewtbî, weçînayîşê 1ê teşrîna peyêne ra ver, Serekwezîro kehen Ahmet Davutogluyî bajarê Wanî de bi hawayo aşkere vatbî ‘eke ma nêrî îqtîdar do Torosê Sipîyî reyna bivejyî rasteyan.’ Reyna Bînalî Yildirimî zî eynî çarçewa de qisey kerdbî û şarî tehdît kerdbî. Seba ke çîyo ke no hukmat vajo nêmendo, şarî tehdît kenî. Wexto ke tehdît kenî zî çîyê ke bin hişê înan de yî, ê zî vejîyenî teber. No hukmat, hukmatê tehdîtî yo û krîz û kaosî ser ro estena xo domneno. Bitaybetî nê çend serranê peyênan de no tarz esas gêno. Duştê hêriş û şîddetî zêde keno, bi no hawa kaos û krîzêko gird vejeno, dima ra dest erzeno, sey ke çareser kerdo, nîşan dano. Yanî hem dano piro û hem zî weş keno. Hêrişê ke rojawan de kurdan rê bîyêne, teqîyayîşê ke Pirsûs, Anqara, Amed, Edene, Mersîn, Stenbol û sewbîna zaf cayan de bîyî, heme zî bi destê hukmatê yan zî çarçeweya zanayîşê hukmatî de bî. Heta goreyê mi teşebusê derbe daxî bi têkilîya hukmatî de bî, neke kamcîn hetê dinya de ameyo dîyayîş ke hukmatêk derbe ra dima hende bihêz bîyo û hemleya derbe hende açarnayo hetê xo ra. Heto bîn ra cepheyo ke vera hukmatî de her ke şono beno hîra esto û rayberîya nê cepheyî zî kurdî kenî. No cephe do prosesê referandûmî de qederê Tirkîya dîyar bikero. No cephe do vera Sîstemê Serekî ke Tirkîya de vernîya dîktatorî akeno û dormeyê Erdoganî de zirxêko gird awan keno de erjê merdimîye paweno. Çimkî hukmato ke heme erjê merdimîye girewto/gêno bin lingan, esto û çi ehlaq û çi zî huqûq û sewbîna çî verdayo. Vera nêyî de vindetiş, ancax referandûm de bi vatişê ‘nê’ mumkin o. Nê referandûmî de sedemê vatişê ‘nê’ xeylî zaf î; seba qedênayîşê dîktatorî, krîzê ekonomî, neheqî, zext, bêehlaqî û sewbîna xeylê çîyê ke ganî bêrî bedilnayîş, estî. Çimkî no pêşnîyazê bedilnayîşê qanûno bingeyî yê 12ê êlule ra xirabêr o. Çîyê ke o wext bi destê Kenan Evrenî nêameybî kerdiş, ewro bi destê Erdoganî yenî kerdiş. Cok ra ganî her kes nêyî ra vajo nê û seba nêyî zî dormeyê xo reyde mîyanê têkilî de bibo.