Rêxistinanê DBP, HDP, KJA, KCD, DEM-GENÇ û Komeleya Alewî yê Demokratîk yê Dersim operasyonê lejkerî yê Dola Mûnzûrî rê ke 4 gerîlayî amey înfazkerden bi nûmayişê mertalê ganî nêrozîbîyen damûsnay û protesto kerdî. Temsîlkaranê sîyasî serva wedarnayişê tecrîdî, serva peynîardişê operasyonanê sîyasî û lejkerî veng day herkesî ke wezîfeyê xo yê demokratîk bîyarê ca.
Quwetanê dewleta tirk 9ê Tebat seatanê şew de Dola Mûnzûr yê Dersim bombevornayen kerd û operasyon da destcikerden.Netîceyê bombevornayenî de 3ê ci cenî 4 gerîlayê HPG amey qetilkerden. Rîwalo ke cenazeyê veşayê nînê silasnayen. Roja ponşeme bado ke rayîra Pilûr amê rakerdene welatijî bi konvoya wesayîtan şî cayê bîyayiş. Welatijê ke cenazeyan girotî bi slogananê “Şehît nêmirenê” kirêştî ambûlansan. Cenazeyê ke wedarîyay nêweşxane seweta otopsî rişîyayî Sazgeha Tib a Edlî yê Meletî.
Sazgeh û rêxistinanê Dersimij dûştê nê operasyon û êrişan Dola Mûnzûr çortalê Venk de nûmayişê mertalê ganî viraşt. Hemseroka Komeleyê Alewî yê Demokratîk Ayten Şîmşîr, Hemşaredarê Dersim Mehmet Alî Bûl, Hemserokê DBP yê sûk Hulya Yer û Mûrat Polat, Hemserokê HDP yê sûk Aslan Çag ra pîya xêlê hemşaredarê qezayan, Pîr û Mayê alewî tewrê nûmayiş bî.
AKP her ca açarna cayê herbî
Hemseroka DBP yê sûk Hulya Yer ke nûmayiş de qisey kerd vist vîrî ke înan rîwalo ke operasyonê lejkerî vindero destpa nûmayiş kerdo. Yer hayr ant weçîntayişanê 7ê Hezîran ser û aşkere kerd ke herbo ke hetê îxtidara AKP ya ke îradeyê şarî çinî hesibnena ame destpakerdiş bi sebebê ganîdayişê xêlê welatijan.
Yer aşkere kerd ke herkes zano ke eke meseleya kurd hal nêbo her roj her ca açaryeno cayê herbî. Hemserokê DBP yê sûk Hulya Yer veng da Dersimijê ke Awrûpa, metropolanê Tirkîye û yê ke Dersim de ciwîyenê û nîya va: “Ma ewro seweta ke bedenê xo rafînê ver teyareyanê herb, tanq û topan ameyê îta. Seweta ke no herb vindero, operasyonî vinderê îta de me. Zey mertalê ganî Dola Mûnzûr de nûmayişê ronişten danime destpa kerden, rîwalê ayî îta de me.” Hulya Yer aşkere kerd ke kam ke kotî der o wa bibo, gunê seweta ke operasyonî vinderê veng bido û va gerek ma veng bidê Kurdistan, no herbî û operasyonan vindernime.
Tecrîdî biqedîne
Hemserokê DBP yê sûk Hulya Yer herzewbîn veng da hikûmeta AKP zî û nîya va: “Ma Dersimijî îta ra vengdayişê xo dîbare kenê; qasîdê haştî Îmrali der o. Ganê tecrîd biqedîyo û açarnîyo muzakereyan.
Hemşaredarê Dersim Mehmet Alî Bûlî zî hayr ant qiseyê pey hewldayena derbe ser û bi nê vatenan nêrazîbîyenê xo aşkere kerd: “Vanê o ke teyareyê herbî visna Feto yo, o ke Roboskî bombevornayen kerd Feto yo. Nî zilmo ke kerdî nika erzenê Feto ser û xo niminenê. Heto bîn ra cayê ke amey bombevornayen de veş rameno. Quwetê dewlet kî Kemere Bel de eve TOMA û wesayîtanê Akrep despa vinderdiş kerdî.
Heto bîn ra birrê Zargovît ke qezaya Dersim Xozad der ê kî bi helîkopteran amey bombevornayen. Birrê Zargovît ke mavêna Dersim merkez û qezaya ci Xozad der ê roza Şemî seatanê şew de amey bombevornayen. Herzewbîn seat 23.30î ra tepya zî quleyanê eskerî ra 4 topî erzîyay.
DÎHA/DERSIM