Endamê Komîteya Caardişî yê PKKyî Duran Kalkanî averşîyayîşê ke mora xo serra 2016 dayî û babetê ke rojeve de yî ser o qisey kerd.
Endamê Komîteya Caardişî yê PKKyî Kalkanî va ‘serra 2016 her hetî ra bîye serra xoverdayîşî û vîrê merdiman de cayê xo girewte’ û qiseykerdişê xo wina domna: “Rayberî, şar, gerîla û sîyasetê demokratîk heme xover dayî. Zor û zehmetîyê 2016î xeylê zêde bî, la qezencê emserr zî xeylê zêde bî. Vatişê Mehmet Tunçî ‘Ma çok nêronenî, ma reyde heşm hîs bikerê’ bî sloganê 2016. Serra 2016 de zafaneyê planê çinkerdişî yê AKPyî veng vejîya û hetta AKP bi xo ameye duştê çinbîyayîşî. Ewro Erdogan û îdarekarê AKPyî vanî ‘ma do çok nêronî’ û no zî nîşanê ma dano ke hende bedelî bi hawayêko veng nêameyî dayîş. Xoverdayîşê ke emserr ameyî nîşandayîş, do bi tîpanê altûninan bivîyarî tarîx. Ma heme şehîdanê xo bi hûrmet û rêze yad kenî.”
Şarê Kurd xover da
Kalkanî qiseykerdişê xo de dîyar kerd ke senî ke serra 2015 zerrîya her kesî seba Kobanê û xoverdayîşê Rojawanî eştê, serra 2016 de zî seba Cizîr, Sûr, Nisêbîn û sewbîna eşt û wina dewam kerd: “Sîstemo qetilkar waştêne ke îradeya şarî bişikno. Seba nêyî heme hêzê xo seferber kerd. Veşnayîşê merdimanê birîndaran ra heta bombavarnayîşê goristanan ser, bi hewteyan erd de verdayîşê cenazeyan ra heta kirantişê cenazeyan, heme çîyê ke destê înan ra ameyî, kerdî. Şarê kurd vera wehşetêko winasî de xover da. Vindetişê Mehmet Tunçî mora xo da serra 2016 ro û bi vatişê Rayber Apo ke vano ‘eke yew cuye bibo o zî bi hawayo azad beno, cuya ke azad nêbo do nêro cuyayîş’ xoverdayîşêko gird ame nîşandayîş.
Erdogan ters cuyeno
Kalkanî dewamê qiseykerdişê xo de va ‘No xoverdayîş ver koalîsyonê AKP û MHPyî kewtî krîzêko gird’ û wina dewam kerd: “Cok ra hukmatê Ahmet Davutogluyî aşma gulane kewt. Reyna temuze de derbeya leşkerî virazîyaye. Hukmatê Erdoganî tay mendbî ke bikewo. Yanî kewt û reyna werişt la çiqas werişto, babeta munaqeşe ya. Ameyo nuqtaya winasî ke sendromê rijîyayîşî cuyeno û mîyanê tersêko gird de yo. Ranêkeweno û her kesî rê kayan kay keno û bi no hawa hewl dano dîktatorîya xo ya şexsî awan bikero. Çimkî Erdogan zano ke do bêro mehkemekerdiş.
Kalkanî ard ziwan ke ‘yew keso ke xora vano nuştox, vejîyayo û vano; ma se kerd ke nêyî ameyî sereyê ma?’ û wina qedêna: “Şima hîna se bikerî? Şima Kurdistan kerd gola gonîye. Yew serrî yo qetlîyamo ke şima nêkerd nêmend. Wexto ke tanq û teyarayan tax, koy û goristanan bomba kedênê, to çepikan seba înan kutêne. Wexto ke Kurdistan de merdimî mirenî, normal vînenî la wexto ke Stenbol de mirenî qiyamet weriznenî. Yê ke va rono, firtone gêno. Faşîzmê AKP û MHPyî 24ê temuze de va ronayî, ewro firtoneyê TAKî gênî.”
Serra xoverdayîşanê tarîxîyan a
Kalkanî yew bi yew xoverdayîşan girewt dest û wina va: “Bitaybetî xoverdayîşê Sûrî hişê dewleta tirkî de tersêko gird awan kerd û taktîkê Fermandar Çîyagerî dewlete gêj kerd. Xoverdayîşêko Gever de ame nîşandayîş zî xeylê gird bî. La Gever de dersê ke ma ê xoverdayîşî ra bivejî estî. Hetê nînan de Nisêbîn de xoverdayîşêko gird ame cuyayîş. Artêşa tirk û hêzê şerî yê taybetî demêko derg sendromê Nisêbînî cuyayî. Şirnex de bi vînîbîyayîşê tewr tay, derbeya tewr gird dîya dişmenî ro. Pîyabîyayîşê ko û bajar tewr baş Şirnex de ame nîşandayîş. Gerîlayan qasê bajaran, koyan de zî xoverdayîşêko gird nîşan dayî û serra 2016 bî serra şero pîl. Cayo ke tede çalakî nêame kerdiş û derbe nêdîya dişmenî ro nêmend. No şer xeta fedayîtî de aver şî. No xoverdayîşo gird, bi şerwanîya Zinar û Doga dest pêkerd û Xarpêt ra heta Cizîr dişmen rê çok da şikitiş. “
Emrê înan heta Newroz o
Kalkanî ciresna ke Tirkîya ameya nuqtaya binkewtişû û va: “Nika keso bi nameyê Suleyman Soyluyo ke DYPyî ra îxraç bîyo, ardî û kerdî wezîr. Soylu hêriş û heqaretê her kesî keno. Ma nînî duştê înan labelê ez heme vatişanê înan îthamê înan kena. Nê serserî, lumpen û qatil î; dîyar nîyo ka kurd î an nê? Soyluyî seba ma heta aşma nîsane wext dayo, la ez tîya ra vana, emrê înan heta wisare zî dewam nêkeno. Ez înan rê heta Newroze wext dana, îtîfaqê AKP û MHPyî do demêko nizdî de birijîyo.
ERSÎN ÇELÎK / ANF/ BEHDÎNAN