Bado ke Partîya Demokratîk yê Şaran (HDP) bado ke aşkere kerd ke iyê dê zey partî bikewê weçîntayişanê 7ê Hezîrana 2015î bibê, hikûmeta AKP zî destpa tehdît û şantajan kerd û bi nayî waşt HDP no qerarî ra ageyrno.  La HDP ya ke qerarê xo ra peyser nêageyra bi slogana  ‘Weşîya Newî’ destpa tekoşîna xo ya weçîntayişî kerd. Herzewbîn bi kampanyaya “Ma dê to nêkerê serok” dûştê xeyala Erdogan û AKP vindîya. Na tewra HDP weçîntayişan mîyan de zî veng da û xo seba 7ê Hezîran hadre kerd. Heta roja weçîntayişî xêlê buroyê weçîntayişî û banê HDP amey bombevornayen, qezaya Çewlîg Kanîreş de şoforê wesayîta weçîntayişî Hamdûllah Oge ame kiştiş, 2 roj verîya weçîntayişan zî mitîngê Amedî de hêrişa bombeyî virazîya, 4 kesan weşîya xo kerd vinî, bi qasê 400 kes zî bî dirbetin.

Omidê demokrasî ganî kerd 

Weçîntayişan de pawiyayişan ra vêşêr HDP resya serkewtişeke girdî û  se ra 13,12 rêjeyan de dêsê weçîntayişî welişna. No teqabulê 6 mîlyon 57 hezar 506 reyan keno. HDP 14 sûkan de bi rêjeyeke berz bî yewîne û 80 parlamenter rişna meclîsî. Bi no şiklî omidê demokrasî, têdûştî û azadî Tirkîye de ganî kerd. Bado ke HDP dêsî ravêrna û komeke xort Meclîs de rona, xeyalê Erdoganî yê seba sîstema serokînî pûç vejyay û raya rejîmeke dîktatorî amê girotiş. Eynî wext de serdestîya 13 serran ê AKP qedîya. AKP ya ke nayî hezm nêkerd hadreyînê weçîntayişanê rewî yê 1ê Mijdare kerd. 20ê Tîrmeh ra tepya zî AKP startê herbî da û nîyetê xo yê esasî deşîfre kerd. Heta roja weçîntayişanê 1ê Mijdare AKP her firsetî de HDP hedef girot û hêrişê ci kerd. La rexmê nê hêrişan zî HDP weçîntayişan de se ra 10,76 reyan girot û 59 parlamenterî riştî Meclîsî. 

Parlamenter hucre de yê

Hona serrekê ser weçîntayişan ra nêravêrd, heqê destnêdayişê parlamenteranê HDP ame wedarnayiş û AKP û medyaya hetkar destma hêrişê û hedef damûsnayişê wekîlan kerd. Derbeya tewr peynî yê AKP 4ê Mijdare de virazîya. Hemserokanê Pêroyî yê HDP Selahattîn Demîrtaş û Fîgen Yuksekdag ra pîya parlamenter Nûrsel Aydogan, Sirri Sureyya Onder, Selma Irmak, Ferhat Encu, Gulser Yildirim, Îdrîs Balûken, Ziya Pîr, Leyla Bîrlîk, Abdullah Zeydan, Îmam Taşçier û Nîhat Akdogan amey binçimgirewtiş. Polîsan bi şiklekê korsanî eştî ser keyeyanê wekîlan, înan girotî bin çiman û rojekê dima ra sewqê mahkeme kerdî. Parlamenteran ra Sirri Sureyya Onder, Ziya Pîr û Îmam Taşçier bi şertê kontrola edlî serbest veradîyay. 10 parlamenterê bînî zî tepêşîyay û rişnîyay girotxanreyan. Qerarê verîn yê Mahkemeya Destûra Bingehîn yê derheqê wekîlanê tepiştî nêdîyayiş ra ame û wekîlê HDP rişîyay girotxaneyê tîpa F ê Edîrne, Stenbol û Kocaelî.

Demîrtaş û Yuksekdag vistî tecrîdî

Hemserokê HDP Selahattîn Demîrta ke wextekê derg o hedefê kampanyaya  lînçî de bi, no 28 rojîyo Girotxaneyê Tîpa F yê Edîrne de bi tenya sereyê xo tecrîdî de yo. Demîrtaş Bloka C de, ke tepişteyê edlî û çeteyê El Qaîde yenê girotiş de tepêşîyeno. Bado ke na xeber amê aşnawitiş û nêrazîbîyayişî berz bî, tayî tepişteyê edlî û sîyasî yê bloka C amey sirgûnkerdiş. Îdareyê girotxane, cayo ke Demîrtaşî hucre ra vejêro, çormeyê ey kerdî veng û Demîrtaşî tepişteyanê siyasî het de bi ca nêkenê. 

Hemserokê HDP Fîgen Yuksekdag zî verîya 28 rojan, 5ê Mijdare de keyeyê xo Enqere ra amê binçimgirewtiş û Amed de amê tepiştiş. Yuksekdag berdî Girotxaneyê Tîpa F yê Kocaelî û tîya de hucreyê yew kesî de yena girotiş.

Balûkenî rê cezaya bêpeynî

Serokwekîlê Koma HDP û endamê Heyeta Îmrali Îdrîs Balûken ke Çewlîg de ame girotiş zî bi îdiayanê “hewldayenê rijnayişê yewî û yewbîyayîşê welat”, “endambîyayişê rêxistin", "propaganda rêxistin" yeno sûcdarkerdiş. Dûştê Balûkenî ke Girotxaneyê Tîpa F yê Kandira de yeno tepiştiş de bi lez û bez gerrename ame hadrekerdiş. Goreyê no gerrename yî Balûkenî rê cezayê tepiştişê bêpeynî (muebed) û 15 serrî zî cezayê tepiştişî yeno waştiş. 

Vengê Roboskî Ferhat Encu

Parlamenterê HDP ê Şirnexî Ferhat Encu ke komkişkena Roboskî de xêlê merdimê xo kerd vinî zî no serrîyeko hedefê hêrîşanê polîs û lejkeran de yo.  Encu ke 4ê Mijdare de ame girotiş, rişnîya Girotxaneyê Tîpa F yê Kandira û hucreya yew kesî de yeno girotiş. Encu seba roşnîkerdişê kiştoxanê komkiştena Roboskî kursiyê parlamento ra kewtbi zerreyê hewldayenan. 

Pêrokîn wekîlê Colemêrg tepiştî yê

Operasyonê rehîngirotişî de 3 parlamenterê HDP yê Colemêrgî Selma Irmak, Abdullah Zeydan û Nîhat Akdogan zî amey girotiş. Irmak ke 2011î de tepiştî bî, zey parlamenter amê weçîntayiş û 3 serrî girotxane de mend, nika Girotxaneya Homara 9. yê Sîlîvrî de yena tepiştiş.  Abdullah Zeydan zî Demîrtaşî ra pîya rişnîya Girotxaneyê Tîpa F yê Edîrne û hona zî ewja de hucre de yeno tepiştiş. Destûr nîno dayiş ke Zeydan bi teberî ra têkilî virazo. Nîhat Akdogan zî rişnîya Girotxaneyê Sîlîvrî. Tepiştişê Zeydanî ra pîya 83,71 reyê weçîntoxanê Colemêrg amey talankerdiş. Parlamentera HDP yê Mêrdînî Gulser Yildirim rişnîya Girotxaneyê Tîpa F yê Kandira, Nûrsel Aydogan zî rişnîya Girotxaneyê Homara 9. yê Sîlîvrî. Aydogan zî zey wekîlanê bînî hucre de yena girotiş. Leyla Bîrlîk ya ke Girotxaneyê Homara 9. yê Sîlîvrî de yena tepiştiş zî weçîntayişanê 1ê Mijdare de Şirnex de se ra 84.13 rêjeyî rey girotbî.   


ANF / AMED