Rochelato Mîyanên de ke şerê barrekerdişî êy hîrine yeno rayirberdiş, her ke şino awe germine bena. Badê têkşîyişê DAIŞî bitaybetî zî xelesnayişê Reqqa ameyê hîvîkerdene ke do bi awayêko sîyasî çareserîyêke bêro dîyiş.
Herçende di qada mîyannetewî de nîşaneyî naye est ê, û Amerîka û Rûsya bi eşkerayîyêke vatî “ma çereserîya sîyasî ser o pê kerdo” zî kifş o ke do no mîr hema zaf awe bianco. Çareserîya sîyasî ya ke di Sûrîye de yena behskerdiş, wina eyseno ke bena palika plansazîyêka bîne ya newîye.
Bi ver bipeynîşîyişê şerrê Reqqa, di Rochelato Mîyanên û Kendawe de serobinbîyişê neweyî kewtîy rojdeme. Plansazîye, bi ambargoya verva Qatarî dest pêkerd û tewr peynî zî îstîfaya Serokwezîrê Lubnanî Herîrî, resa astêka newîye.
Heta nika di Rochelato Mîyanên de lejê wekaletî est bi. Hêzê mîyannetewîyan wekîlanê xo ser ra şer dayê domnayiş. La êdî wekîlî nêmendî. Hêzê muxalîfî, bi plansazîya Rûsya, bi destê dewleta Tirke amey tasfîyekerdene. DAIŞ, bi hemkarîya QSD û Koalîsyonê mîyannetewî ame çinêkerdiş. Bi tasfîye û çinêkerdena wekîlan, nika hêzê esasî di dewre de yê. Coka do şerê esîlan, yê wekîlan xidarêr û xorîyêrî bo.
Bi plansazîya newîye, rewşa şerî zî vurîya. Nika lej, mabenê hêzanê esasîyan êy koalîsyonê mîyannetewî ke serkêşîya ey Amerîka kena, Rûsya, dewletê herêmîyan û hêzê şaran ke bi felsefe û paradîgmaya Rayver Ocalanî, serkêşîya ey PKK keno, de yo.
Hêzê Gerdûnî, seba bi awayêko rihet têgêrayişê sermîyanê gerdûnî û kontrolkerdena çimeyanê enerjîyî ke seba naye Rochelatêko aram hewce yo, hêzê statîkopawêrî êy herême seba domnayişê rewşa verêne û hêzê şaran zî seba cuyêka azade, demokratîk û têdirî êy şaranê herême têkoşîn danê.
Di na gerremole de hêza tewir bisihûde, hêzê şaran o. Hetê heme hêzan ra ameyo fehmkerdiş ke tu hêzêke bi qasê hêzê şaran wayirê plan, proje û pergale nîyo. Reyna xêncî projeyê hêzê şaran, projeyo ke di Rochelato Mîyanên de aramîye pê bîyaro zî çîn o.
Xora Şerê Barrekerdişî, seba dîzaynkerdişê hêzê statukopawêran êy herême amebi destpêkerdene. No statuko verva dîzaynê neweyî asteng bî û gere dewletê herême bi goreyê hesabê sermîyanê gerdûnî newe ra bêrê dîzaynkerdiş. Naye zî bi hemleya ‘Wisarê Ereban’ dest pê kerd û resa asta ewroyine.
Di na rewşe de seba vatişê “dewletê di rêze de Îran û Tirkîya yê”, hewceyî bi munecîmî yan zî zanista sîyasetî çîn a. Her çende sûco pîl yê Barzanî û YNK bo zî, teslîmkerdişê axa Kurdistanê Başûrî ya Hikumatê Îraqî zî bi temamî, perçeyêkê na plane yo. Nika mesele na ya. Gelo do vernî Tirkîya yan Îran bêro hedefgirotiş. Bi bi goreyê têgêrayişanê eskerî hedef de Îran est o. La plansazîyê netewî bi qaso ke ma nêşikenê xeyal bikerê, têtewer û komplîke yê.
Dewleta Tirke bi polîtîkaya xo ya ke ro ser neyartîya Şarê Kurdî ameya awankerdene, bi temamî vînî kerdo û mabenê Amerîka û Rûsya de, bîya goga lingan. Meseleya Zarrabî, belgeyê hetkarîya DAIŞî êy destê Rûsya û Amerîka, seba hefsarkerdişê Erdoganî bes ê.
La îtîya de xetereyêka pîle est a. Erdogan şikeno bibo sebebê alozîyê girdan û bêke sira bêro ey, bi xo hemle bikero. Dewaya Zarrabî 27ê menge de yena dîyayiş û vanê Zarrab do seba ke xo bixelesno, dest bi îtîrafan bikero.
Nêy îtîrafan de Erdogan û malbata ey est a. Îtîrafîy do zaf veng vecê. Seba ke nê vengî qasêke kemî bikero, Erdoganî rê vengêko ney berzêrî lazim o. Bena ke Erdogan vaco min ra dime qîyamete û erîşêke pêk bîyaro. Hedefa yewîne Efrîn yan zî zerre de pravakasyonêko zaf pîl.
Kam çi zaneno. Însan hovîtîya tewir pîle, di terso tewir pîl de pêk areno.