Seba wayîrvejyayîşê xoverdayîşê zîndanan, her ke şino nûmayîşî vilayê her ca benê. Welatanê Ewrûpa de, xêlê cayan de nûmayîşî virazîyay. Sûka Fransa Strasbûrg de zî, ver banê Konseyê Ewrûpa û Komîteyê Verîgirewtişê Îşkence (CPT) de nûmayîşê Grevê Veyşanî destpa kerd. Bi no nûmayîşî hayr ancîyeno Grevê Veyşanî yê tepişteyanê sîyasî yê Girotxaneyanê Tirkîye ser.
Nûmayîşo ke roja Panşeme destpa kerd de bi desan endamê KCDK-E, sîyasetmedar, nuştox, hunermend û aktivîstê serbestîye ca gênê. Kesê zey Parlementerê HDP Faysal Sariyildiz û Tûgba Hezer, Hemserokê KCDK-E Yuksel Koç, Hemseroka NAV-DEM Fatoş Goksungur, temsîlkara TJK-E Hanim Engîzek, Hemserokê FEDA, temsîlkarê CÎK ûsb. temsîlkarê xêlê rêxistin û sazîyan tewrê nûmayîş benê.
Herzewbîn rojnameger Ahmet Nesîn, Hunermend Pinar Aydinlar rojnameger Fîlîz Koçalî, akademîstey Ûtkû Sayin, nuştox Azîz Tûnç, akademîsyen Doç. Dr. Îbrahîm Seydo Aydogan, rojnameger Îbrahîm Çîçek, rojnameger Fusûn Erdogan, Hemverfekê HDK-A Demîr Çelîk zî seba paştîdayîşî tewrê grevê bidem û bidorveger bî.
‘Ganî CPT û KE bikewo hereket’
Nûmayîş bi damûstayîna çapemenî û bi tewrbîyayîşê seyan kesan destpa kerd. Damûstayîn de hayr ancîya binlingkerdişê tepişteyanê sîyasî û Grevê Veyşanî yê Girotxaneyanê Tirkîye ser. Herzewbîn vajîya ke tepişteyê sîyasî sînorê merdişî de yê. Damûstayîna wertex de ame vaten ke tepişteyan rê zey ayîra xoverdayîşî tenya Grevê Veyşanî mendo.
Damûstayîn de waştenê nûmayîşkarê ke destpa Grevê Veyaşî kerdî winayê:
* Ganî sîyaseta Tirkîye waştenanê meşrû yê tepişteyan bigîro ver çiman.
* Ganî CPT desinde girotxaneyanê Tirkîye teftîş bikero,
* Ganî Konseyê Ewrûpa nezdê Rayverîye Tirkîye de bikewo hereket
Damûstayînî ra dima, ser nameyê nûmayîşkaran jew heyetî bi sermîyananê CPT ra pêdîyayîş viraşt û waştenanê xo ciresna.