Platformê Dagîrkerîya Kurdistanî ra Vaje Bivindere vera hêriş û dagîrkerîye de siba do xeylê cayanê dinya de çalakîyanê ortaxan organîze bikero. KCDK-Eye zî îzehetê xo de seba beşdarbîyayîşê çalakîyan veng dayo heme kurd û dostanê kurdan. KCDK-Eye dîyar kerdo ke dewleta tirkî wazena qezencanê kurdan çinî bikera, cok ra ganî ê zî nê qezencan bipawî. Platformê Dagîrkerîya Kurdistanî ra Vaje Bivindere mîyan de kurd, tirk, asurî, suryanî, laz, armenî, çerkes, cinî, akademîsyen, ciwan, elewî, êzidî, muslumanê demokratî û sewbîna ca gênî. Platform do Ewropa, Japonya, Kanada û Avustralya de xeylê eyalet û welatan de çalakîyanê ortaxan organîze bikero. Kongreya Komelê Demokratîke ya Kurdistanî ya Ewropa (KCDK-E) ke destek dana çalakîyan, seba çalakîyê ke 28ê Temmuze de xeylê cayan de bêrî viraştene, îzehetêk daye. KCDK-Eye dîyar kerd ke îttîfaqê faşîstî yê AKP û MHPyî û Erdogano dîktator seba ke qezencanê kurdan çinî bikerî, hêrişê çar parçeyanê Kurdistanî kenî û wina domnaye: “Dewleta tirkî verê cû bi destê çeteyanê DAIŞî hêrişê Başûrê Kurdistanî, Şengal û şarê ma yê Rojawanî kerdî û waşte netîce bigîro. Labelê sernêkewte û nika zî bi xo şer îlan kerde.” KCDK-Eye dewamê îzehetê xo de wina va: “Xeylê dewlete û dezgeyê mîyanneteweyî vera talan, qetlîyam û dagîrkerîya ke Efrînî ser o bîyênê de bêveng mendî û bi no hawa cesaret dayî Erdoganî. Dewleta tirkî zî nika hêrişê Kurdistanî kena. Bi hawayo aşkere aseno ke dewleta tirk seba ke qezencanê şarê ma çinî bikera, hêriş kena. Wina aseno ke nê hêrişî do hîra bibî. Ganî ma do vera nê hêriş û dagîrkerîyan de yewîya xo ya neteweyî û piştîdayîşyewbînanî gird bikerî.” Ganî ma hêrişan veng bivejî KCDK-Eye îzehetê xo de qala yewîya neteweyî kerda û wina vato: “Ganî ma vera hêriş û dagîrkerîye de bi hawayo lez yewîya neteweyî awan bikerî û nê hêrişan veng bivejî. Reyna ganî ma melumat bidî raya pêroyî û rîyê Erdoganî yê qetlîyamkarî teşhîr bikerî. Seba demokratîkbîyayîşê Tirkîya û Rojhelato Mîyanên, ganî ma qala muhîmîya vindarnayîşê hêrişan bikerî. Na çarçewa de ma veng danî raya pêroyî ya demokratîke ke wa vera hêriş û dagîrkerîye de reaksîyonê xo zêde bikerî. Bêvengmendişê dezgeyanê mîyanneteweyîyan yeno manaya tesdîqkerdişê qetlîyaman. Vengdayîşê ma o yo ke wa nêbî ortaxê sucanê dewleta tirkî.” Ancax ma pîya eşkenî qezancan bipawî KCDK-Eye îzehetê xo de qala muhîmîya pîya hereketkerdişî kerda û wina dewam kerdo: “Hêzê demokrasî yê mîyanneteweyî eşkenî bi xoverdayîşêko ortax, nê hêrişan veng bivejî. Eke ma nê hêzê xo bikar bîyarî, ma eşkenî qezencanê şaranê Kurdistanî bipawî. Platformê Dagîrkerîya Kurdistanî ra vaje Bivindere do 28ê Temmuze de heme cayan de çalakîyanê protestoyî bikero. Ma sey KCDK-Eye veng danî heme kurd û dostane kurdan ke wa bi hawayo aktîf beşdarê çalakîyan bibî.” Cayê ke tede çalakîyî bêrî viraştene, nê yî: Almanya de; Dueseldorf, Frankfurt, Stuttgart û dormeyê ci. Fransa de; Parîs, Marsîlya û Bordeaux. Swêd de Stockholm, Avusturya de Graz, Swîsre de Lausanne, Danîmarka de Kopanhagen û Norveç de Oslo. ANF/BRUKSEL