Yildirim’î derheqê qewimyayîşê peyênan de Ajansa Xeberan ê Firatî rê qisey kerd û dazanayîşî ke Seray wazena şarê kurd bêveng bikero. Yildirim’î hêrişê vera HDP zey hewldayenhe bêîradeverdayîşê şarî hesibna aşkere kerd ke ê dê mîyanê heme şert û mercan de xo ver bidî.
Parlamenter Yildirimî îzah kerd ke mekanîka derbe ke AKP/Serayî vera sîyasetê kurd de ramneno, wexto ke 80 parlementerê HDPî şîyî meclîsî ra dima kewto dewre û nîşan kerd ke vera AKP/Seray, MHP, CHP, Ergenekon û Balyozî de ê bi destega şarî bîyê yew beden û vindertî.
Abûqa, OHAL û qetlîam
Yildirimî vist vîrî ke AKP/Seray serkewtişê HDP hezm nêkerdo, naye ra lejî kero gird û îna vat, “Bi abluka, kerdenê rewşa OHALî û qetlîaman kerdî ke waştişê azadî û demokrasî yê şarê kurd bifetisnî. Semedo ke sîyasetê kurd rol û mîsyonê xo nêaro ca, Meclîs de xebatî ameyî astengkerdiş. Rejîmê AKP/Seray ke nê hêrişan rê çiyêk nêgirewt, semedo ke HDP bêveng bikero, destperanêdayîşan ard rojeve û naye Meclîsî rê da qebûlkerdiş. Nameyê naye destperanêdayîş nîyo. Vera ma de derbe yo. Xura heqêko ma yo înasî tu wext çinîbi. Semedo ke ma nêeşkî xo biresnî şarî, destê înan rê çi yeno kenî. Têdeyîyê heme fezlekeyê ke vera ma de ameyî hedrekerdiş, vengdayîşê ma yê semedê aşitî, demokrasî û azadî yî.’
Parlementer Yildirimî nîşan kerd ke vera sîstemê serektî de astengîya en pîle HDP ya, aye ra Seray wazeno HDP bêtesîr biverdo û Meclîsî rê bierzo.
‘Ma bi şarê xo estê'
Yildirimî eleqe ant wayîrvejîyayîşê şarî ser û îna vat, ‘Şar wedartişê destperanêdayîşanê ma sey xelata şerefî vîneno. Şar vano ke o zaf baş no proses zano, kam heqdar o, kam neheq o û ma ra wazeno, ma naye bixurtî bivajî. Şarê ma ke ray dayo ma û verê ma de yo, heme karê HDPî zano. Naye ra ma tena nêverdeno. AKP/Seray keno ke no wayîrvejîyayîşê şarî zî bigêro. Labelê vera naye de ma do mîyanê şarê xo de her çi bivajî. Kombîyayîşê taxan, mitîng û komûnan de ma şarî dir yenî yewca. Ma bi şar vejîyayî, heta ke no şar esto ma do rayîrî ra şêrî. Çunkî ma komelêko gelek baş ke bi ‘xoverrodayîş cuye yo’ xo resnayo na merhela zanî. Ma bi qanûnê înan ê faşîst nêameyî weçînayîş. Şar ma weçîna. Şar vajo çi, do o bêro viraştiş. Şar ma ra wazeno wa ma xo ver bidî, heqê înan, heqê xo bipawî. Ma do xo ver bidî.’
HASAN YOLDAŞ/ANF/SEMSÛR