Dûştê şaredarî û sîyaseta kurd derbeya AKP ramena. AKP jû hetî ra qeyûman erzena hurendîya şaredarîyanê DBP, heto bîn ra şaredarîyanê ci tepêşena. Tewr peynî de roja verî Hemşaredarê Sûka Pîl yê Amed Gultan Kişanak, Firat Anli û verfeka KJA Ayla Akat Ata tepêşîyay. Na derbeya AKP raştê reaksîyon û nêrazîbîyenanê tûnî amê.
Kişanak û Firat Anli ke 25ê Cotmeh de bi îdiayê ‘Endamê rêxistinîye’ roja Yewşem vejyay vernîya mahkeme û amey tepiştiş. Qiseykerdoxa KJA Ayla Akat Ata ke 26ê Cotmeh de ver şaredarîye de tewrê damûstayîn bî girotîya bin çiman. Ata zî roja verî vejya vernîya mahkeme û bi sûcê ‘Îdarekarîya rêxistin’ tepêşîya. Ata, Kişanak û Anli rişîyay girotxaneyê Tîpê F yê Kandira yê qezaya Kocaelî.
Heme cayan de xover bide
Hemsereka DBPyî ya Pêroyî Sebahat Tuncele derheqê tewqîfbîyîşê Hemserekê Şaredarîya Bajarê Girdî yê Amedî Gultan Kişanake û Firat Anli û verfeka KJAya Ayla Akat Ataye de va: “Ganî şarê ma heme cayan de xover bido.”
Hemserekê Şaredarîya Bajarê Girdî yê Amedî Gultan Kişanake û Firat Anli û Verfeka KJAye ya Demî Ayla Akat Ataye ameyî tewqîfkerdiş. Merkezê Pêroyî yê DBPyî de vera tewqîfkerdişan de kombîyayîşê çapemenîye ame viraştiş.
Wekîla Hemserekîye ya Grûba HDPyî Çaglar Demîrele, Hemsereka KCDyî Leyla Guvene, Hemserekê Pêroyî yê DBPyî Sebahat Tuncele û Kamûran Yuksek beşdar bîyî.
Bi serewedaritişî eşkenî bivinderî
Sifteyîn Hemserekê DBPyî Kamûran Yuksekî qisey kerd û va ‘AKP bi ternayîşê çimê şarî wazeno rejîmê xo bido awankerdiş’ û qiseykerdişê xo wina domna: “Ê ke vera ci de vindenî an yenî qetilkerdiş û an zî tewqîf keno. Vera nêyî de encax ma bi serewedaritişî eşkenî bivinderî. Ganî ti kes na derbe qebûl nêkero. Ma encax bi xoverdayîş eşkenî nê rojan de payan ser de vinderî. Ma do sey DBPyî vera nê hêrişan de xover bidî.”
Dima Hemsereka Pêroyî yê DBPyî Sebahat Tuncele qisey kerd û Tuncele dîyar kerde ke ‘Ewro ma prosesê derbe de cuyenî’ qiseykerdişê xo wina domna: “Ewro prosesê 15ê temuze hawayo xorî yeno domnayîş. Vera derbe de xoverdayîş meşrû yo. Derbeya ke vera înan de ameya viraştiş sey sûcî vînenî, la encax derbeya xo wazenî şarî ser o ferz bikerî.”
Mesele tena Kişanake, Ataye û Anli nîyo
Tuncele dewamê qiseykerdişê xo de va ‘mesele tena Gultan Kişanake, Ayla Akat Ataye û Firat Anli nîyo’ û wina dewam kerde: “Şarê kurdî seba ke ameyoxê xo awan bikero, pêşnîyazanê xo vano. AKP herinda ke nê pêşnîyazan nîqaş bikero, polîtîkayanê zorî keno dewre. Ma sey DBPyî vera nînan de xover bidî. Ma kesê ke bawerîya xo demokrasîye rê esto, ma zaf bedelî dayî, la reyna zî ma kulturê xo yê sîyasîyî ra fek veranêda.”
Eke kurdî azade nîyî şarê Tirkîya zî azad nîyo
Tuncele qiseykerdişê xo de bale ant azadîya şaran û va ‘Ganî şarê Tirkîya verê xo bido Kurdistanî û qiseykedişê xo wina qedêna: “Komara ke 93 serreyî ya wextê AKPyî de krîzêko gird cuyena. Her derbe bi qanûno bingeyîn yê xo awan kena û AKP wazeno bi zorî welatî destê xo de esîr bigîro. Vera polîtîkayanê esîrgirewtişî de ma keye bi keye gêrenî. Şarê ma her warî de vera polîtîkayanê zorî de xover dano. AKP wazeno bi şero mîyanênî welatî bideko mîyanê krîzî. Ma embazê Şêx Saîdan û Sakîneyan î û ma qet xoverdayîşî ra fek veranêdanî. Ganî şarê ma her cayan de xover bidî.”
NAVENDÊ XEBERAN