Hêrişê dewleta Tirkî yê vera Başûr û Rojawanê Kurdîstanî ke demêk derg o ke dewam kenî, resayî dûştê dagîrkerîye. Vera nê hêrişan de reaksîyonî her ke şono zêde benî. Kurd û dostê Kurdan xeylê cayanê Ewropa de vejîyayî raşteyan û dagîrkerîya dewleta Tirkî protesto kerdî.
Kurdistanijî û dostanê înan bajarê Marsîlya yê Fransa de hêrişê dagîrkerîye yê dewleta Tirkî yê vera Başûrê Kurdistanî de bi çalakîyêk protesto kerd.
Bi seyan kesê ke cayo tewr sixletî yê bajarî de ameyî têhet, bi siloganan PKK û Rayberê Şarê Kurdî Abdullah Ocalanî rê heskerdiş û giredayîşê xo ard ziwan. Dimayê rayraşîyayîşî verê Temsîlkarîya Yewîya Ewroya ya Marsîlya de mîtîngêk ameye viraştene. Qiseykerdişan de hemkarîya dewleta Tirkî ya hukmatê Hewlêrî bi taybetî zî ya PDKyî ameye protestokerdene.
Heto bîn de bajarê Berlînî yê Almanya de zî hêrişê dewleta tirkî yê vera Başûr û Rojawanê Kurdîstanî ame protesto kerdene. Çalakîya ke hetê Komelê Kurdîstanîyanê Azadan yê Berlînî ra ame organîzekerdene rê dezgehê sey Meclîsê Cinîyan yê DEST-DANî, PYD Berlîn û Ciwanên Azadî zî destek dayî.
Terorê Erdoganî ame lanetkerdene
Çalakîya ke Kuleyê Alexsanderplatz TV ver de ameye viraştene de pankartê ke ser o ‘Terorê Erdoganî rê bes o, Vera şerê faşîstî de piştîdayîşyewbînano enternasyonalîst’, ‘Fek Erdogan rê rotişê sîlehan ra verabidê’, ‘Destek bide Efrînî’ ameyî akerdene û fotografê qetlîyamî ameyî kiriştene. Mîtînge bi rêzgirewtiş dest pêkerd û qiseykerdişê bi Kurdî û Almankî ameyî kerdene û qetlîyam ame şermizarkerdene. Çalakîye de xeylê siloganî erzîyayî. Mîtînge de siloganê ‘Wa bicuyo piştîdayîşyewbînano şorişger’, ‘Heme dagîrkerî Kurdîstan ra bicehimê’, ‘Wa bicuyo xoverdayîşê Efrînî’, ‘Wa bicuyo Rayber Apo’, ‘Cinî cuye azadî’ û ‘Şehîd nêmirenî’ ameyî eştene.
Ciwanan dagîrkerîye protesto kerd
Bi vengdayîşê Tevgerê Ciwananê Şorişgêran (TCŞ) kantonê Solothurnî yê Swîsre de Kurdî ameyî têhet û dagîrkerîya dewleta Tirkî protesto kerd. Çalakîye vernîya îstasyonê trene yê merkezî de ameye viraştene. Çalakîye de pankarto ke ser o ‘Waştişê ma piştîdayîşyewbînanê Kurdîstanî yo’ ame akerdene. Çalakîye de fotografê Rayberê Şarê Kurdî Abdullah Ocalanî û beyraqê PKK û KCKyî ameyî kiriştene. Çalakîye de hemkarîya PDK û dewleta Tirkî ameye protestokerdene. Çalakgêran silogananê ‘Wa bicuyo Ocalan’, ‘Hemkar PDK’, ‘Terorîst Erdogan’, ‘Vizêr Hîtler, ewro Erdogan’ û ‘Ewropa fînanse kena, Erdogan bombe keno’ eştî.
AMED