Rojdem de Virîsê Coronayî nika esto, laşî ra girewtişê vîtamînê Cyî zaf bi muhîm o. Bedenê merdimî aşmanê zimistanî de hîna kêmî enerjî xerc keno û rîskê nêweşî hîna zêde beno û coka ra bedenê merdimî aşmanê zimistanî de enfeksîyonê grîbalî rê amade beno. Ganî merdim nêweşî ra ver pawitişê xo bikero û vîtamînê Cyî zêde biwero. Çîyê awî goreyê lazimî nînê şimitiş û bedenê merdiman bê awe maneno. Ganî roje de tewr kêmî 2 lître awe bêra şimitiş. Wexto ke metabolîzmaya merdimî bêawe bimano, maddeyê toksînî bedenê merdimî ra nînê eştene.
Ganî mase aşmanê zimistanî de sofreya merdimî ra kêmî nêbo. Mîyanê maseyan de asîdê omega 3 runî esta û sîstemê safiyî xurt kena. Hewte de tewr kêmî ganî 2 rey mase bêro werdiş. Aşmanê zimistanî de seba ke tîje kêmî bena bedenê merdimî vîtamînê Dyî kêmî beno. Wexto ke hewa tijîn bibo ganî merdim bivejîyo rayîrşîyayîş û tîje ra feyde bigîro.
Germîya bedene kêmî beno
Hewayo serd de germîya bedenê merdimî kêmî beno. Seba ke merdim dengeyê germîya bedenê xo bitepişo ganî qasê lazimî awe bêra şimitiş. Herinda çay û qehwe de ganî exlemur, şîlane, çayê ada, nane û lîmono ke hetê vîtamînê Cyî de dewlemendî bêrî tercihkerdiş. Ganî aşmanê zimistanî de abur cubur, çerez û şîranê ke şewanê derg û dilayan de yenî werdiş, bêrî kêmîkerdiş. Ganî çerezê runin tay bêrî werdiş û leblebîyî têmîyanê mîyanê çerezan bêrî kerdiş. Ganî taybet şîranê ke kalorîyê înan zaf berzî ra dûrî bêro vindetiş. Hewte de tewr zêde 2 rey şîranê şitin bêrî werdiş.
Sîr û pîyanz antîbîyotîkê xozayî yî. Kêmîya çînko beno sebebê qelsîya sîstemê safiyî. Taybet goştê sipî û sûre hetê çînko de tewr dewlemend î. Aşmanê zimistanî de sîstemê safiyî bi rayîrê hucreyê pawitoxî şixulîyo. Kêmîbîyayîşê nê hucreyan zî seba bedenê merdimî problem o. Stres, depresyon, rincanbîyayîş û bêkeyfî sîstemê pawitişî kêmî kenî. Coka ra kontrolê stresî zaf muhîm o.
AMED