Platformê ‘Rijnayîşê Sûrê rê nê’ seba verîgirewtişê rijnayîşî, bi tewrbîyayîşê endam û îdarekaranê xo Amed de kombîyayîşeke çapemenî viraştî û kampanya îmzeyan da destpêkerdiş.
Platformî Hemverfekê Platformî Talat Çetînkayayî qisey kerd û vist vîrî ke forûmo ke vera rijnayîşî Stenbol de ame viraştiş, do Amed de zî bîro virazîyayîş. Çetînkaya dîyar kerd ke bi eleqedarê rijnayîşê Sûrî, înan bi 16 sefaretxaneyê welatanê endamê Yewîya Ewropa ra pêdîyayîşî viraşto û xeylê sazîyanê Ewropa ra behsê xirabkerdişê Sûrî kerdo. Seba paştîdayîşê platformê înan zî Çetînkayayî berxudarîya xo seba HDP, HDK û Komela Hiqûqa Civakî ard ziwan û vengdayîşê wayîrvejyayîşê Sûrî dibare kerd.
‘Ma dê bibê vengê Sûr’î
Qiseyanê Çetînkaya ra dima, Hemverfeka Platformî Buşra Cîzrelîogullarî zî damûstayîn wend û aşkere kerd ke zey platform înan waşt ke bibê vengê şarê Sûr’î yê ke yenê koçkerdiş. Cîzrelîogullarî vist vîrî ke rixmê pêrokîn zehmetîyanê OHAL’î gureyê înan ê vera rijnayîşî ramenê û aşkere kerd ke heta rijnayîşê Sûr vindero ê dê şarî het de bê û bibê vengê înan.
‘Ganî ma ca de rijnayîşî bidê vindernayîş’
Cîzrellîogullarî hayr ant ser rijnayîşê Sûrî ke rameno û wina dewam kerd: “Seba ke pêro sazî û çormeyê demokratîk wayîrê qîrîna şarê Sûrî bivejyê, ganî wayîrvejyayîşî zey wezîfekeye bivînê. Ganî ma ca de wayîrê Sûrî bivejyê û rijnayîşî bidê vindernayîş.”
Cîzrellîogullarî ard ziwan ke iyê dê pêrokîn kerdenê ke ser ronişteyanê taxanê Alîpaşa û Lalebêy ferz benê bikirêşê rojdema pêrokîn dinya û seba nayî ewro ra tepya heta aşmeke bi slogana ““Sûr dinyayê ma yo ortex o, wa rijnayîş vindero” destpê kampanyaya îmzeyan kenê.
@SurPlatformu
Buşra Cîzrelîoglullarî da zanayîş ke îmzeyê ke bîrê arekerdiş, dê serokê TBMM ra bîrê rişnayîş û wina va: “Kampanyaya ma ya îmzeyan do eynî wextî de do ser tora civakî de zî îmzeyan are bikero. Sazî û kesê ke teberê Amedî de ciwîyenê û wazenê paştî bidê kampanya, êşkenê ser hesabê Twîttirî y @SurPlatformu xo biresnê ma.”
Hemverfeka Platformî Cîzrelîogullarî vist vîrî ke heqê mordeman ê esasî û hiqûq her roj yenê îxlalkerdiş û qiseyanê xo bi nê vatenan domna: “Bi bawerî û zanayîşê şarê têkoşer ê ortax ma şenê rijnayîşî vindarnê û bi no şiklî serbikewê. Bi na bawerî û zanayîşî ez veng dana her kesî ke desteg bidê kampanya.”
‘Pêdîyayîşê bi UNESCO ra ramenê’
Cîzrelîogullarî cewab da persanê rojnamegeran û aşkere kerd ke qada mîyanneteweyî de zî înan plansazîyeke amade kerda û na derheqî de pêdîyayîşê înan bi UNESCO ra ramenê.
Cîzrelîogullarî tewr peynî de vist vîrî ke na mesele, meseleya pêrokîn Tirkîyeya û wina va, “Nayî ra ma kampanyaya xo Tirkîya de da destpêkerdiş. Şar nêwazeno ke Sûrî ra bivejyo. Seba ke şar newe ra keyeyanê xo virazo, ma omid kenê ke îmkanî bîrê dayen.
Kombîyayîş bi dasilasnayîşê broşûr û îmzeyanê ewil yê seba Kampanya amey eştiş, qedîya.
DÎHABER/AMED