Pêşnîyazê bedilnayîşê qanûno bingeyî Meclîs ra derbaz bî û erşwîya Serekkomar Erdoganî ver. Nika prosesê referandûmî rojeve de yo. Nika ra partîyê sîyasî fikrê xo yê referandûmî aşkere kerdî û xeylê hunermend û kesê namdar zî fikrê xo aşkere kerdî/kenî. Heta nika cepheyêko hîra ya nêyî vejîyayo raste. Xeylê rêxistine û komeleyî vera nê bedilnayîşî de ameyî têhet. Babete ser o ciwanan qisey kerdî.
Endama Federasyonê Komeleyê Ciwanê Sosyalîstan (SGDF) Aylîn Yildize wina va: “Ma bi siloganê ‘vera Serekîye de ciwanî estî’ ameyî têhet. Qirkerdişê Pirsûsî ra dima welat kewto mîyanê prosesê şerî yo girdî. No şer her ke şono gird beno û hukmat seba ke rejîmê yew merdimî awan bikero heme muxalîfan ser de polîtîkayê tepiştiş, tewqîfkerdiş û qirkerdiş meşneno.
Ganî merdim meydanan de bibo
Yildize dewamê qiseykerdişê xo de va ‘heme ciwanî do seba aştîye taxe û rasteyan de bibî’ û qiseykerdişê xo wina domnaye: “Ma heme ciwanî ameyoxa ser o etiryenî û ma vanî ‘vera Serekîye de ciwanî estî’. Ma seba fikir û azadîya xo taxe, raste, unîversîte û heme waran de vera Sîstemê Serekî de yî. Wextê îqtîdarê AKPyî de ma sîstemê camêrdî hîna zaf hîs kerd û AKP îqtîdaro ke tecawizî meşrû kerdo yo. Cok ra ganî ma ciwan û cinîyî vera Serekîye de rasteyan de bibî.”
Serekî 7'ê Hezîrane de dest ci kerd
Endamê Dev Guçî Nîhat Bayavî zî va ‘AKPyî seba Serekîye welatî açarnayo cayê şerî’ û wina dewam kerd: “Her roje merdimî bi bombeyan, cinîyî zî rasteyan de yenî qetilkerdiş. Akademîsyen û mamostayê ma yenî tepiştiş û wazenî heme muxalîfan bêveng bikerî. Na çarçewa de hemserekê partîyan û parlamenterî yenî tewqîfkerdiş û qayûmî tayînê şaredarîyan benî. Ma seba ke bombeyî nêteqyî, domanî nêrî kiştiş û mektebê ma hîna azad bibî, tîya de yî. Ma do mekteban de, rasteyan de, otobusan de, keştîyan de, sûke, bazar û sewbîna kura beno wa bibo, ma do heme cayan de ‘nê’yî rêxistine bikerî. Seba ke Kurdistanî ser ro abluqa bêro wedarnayîş, ma do vajî ‘nê’. Seba ke cinîyî nêrî kiştiş, ma do vajî ‘nê’.”
Heto bîn ra Meclîsa Cinîyan ê DBP zî derheqê referandumî de kombîyayişê çapemenî viraşt û rejîma “yew merdimî” rê vatî nê. Meclîsî veng da pêrokîn cenîyan ke cepheyê “Nê” de xo rêxistin bikerê.
DÎHABER/EDENE