Gerîlayê Hêzê Pawitişê Şarî vera hêriş û dagîrkerîya dewleta tirkî de xoverdayîşêko tarîxî nusenî. Gerîlayan dîyar kerd ke seba ke dewleta tirkî nêşêna bejayî ra şer bikera, hewa ra hêriş kena û teknîkî bikar ana û wina domna: “Leşkerî nêşênî şer bikerî. Zaf reyan bi rojan cenazeyê leşkeran erd de manenî. Ma vera teknîkê dişmenî de taktîkan aver benî.”

 

ZEYNEP NERGÎZ BOTAN / ANF /  BEHDÎNAN

Demêko derg o ke dewleta tirkî hewl dana Başûrê Kurdistanî dagîr bikera û vera hêriş û dagîrkerîya dewleta tirkî de xoverdayîşê gerîlayan bêmabên dewam keno. Heta nika gerîlayan derbê girdî dayî dewleta tirkî ro û dewleta tirkî netîceyê şerî de zaîyatêko gird dayo.

Gerîlayê HPGyî derheqê nê xoverdayîşî de qisey kerdî û melumatê muhîmî dayî. Gerîlayan dîyar kerd ke dewleta tirkî wazena Başûr dagîr bikera û dayî zanayene ke ê hêvî kenî ke şarê Başûrî do sey 2007î vera hêrişan de bivindero.

Gerîlayan ra Xerzan Bidlîsî va ‘hem Vakur û hem zî Başûr de şerêko gird esto’ û wina domna: “Xeylê warê gerîlayan hêrişê faşîzmê tirkî reyde têrî yî. Dewleta tirkî Lêlikan û Bradost de hewl dana dewijan surgun bikera. Ma tarîxê xoverdayîşî ra zanî; waştî bikewî Zap, labelê remayî. Nika zî kewtiş nêbeno nasîbê înan. Her roje helîkopterî merdeyan benî. Ma çalakîyan de dî, leşkerî heme çîyê xo verdanî û remenî. Nika ra pey zî çiqas hêriş kenî wa bikerî, nêşênî qezenç bikerî. Şerê ma do qezenç bikero.”

Şar sey 2007î eşkeno veng bivejo

Gerîla Zagros Arazî va ‘dewleta tirkî bi hemkarîya herême reyde hewl dano operasyonî bidomno’ û wina dewam kerd: “Nê operasyonî raştîya xo de seba dagîrkerdişê Başûrî yenî viraştene. Leşkerî nêşênî şer bikerî. Zaf reyan cenazeyê leşkeran bi rojan erd de manenî. Taktîkê gerîlayan teknîkê dişmenî veng vejeno. Ez zî Başûrê Kurdistanî ra ya. Senî ke 2007 de şar bi tirso ganî û vera hêzanê dewleta tirkî de vindet, ewro zî eşkeno bikero.”

No şerê rûmetî yo

Azad Garzanî zî wina va: “Serra 2018î seba ma zaf muhîm bîye. Şerê ma vera dagîrkerîya dewleta tirkî de resa dûştêko gird. Dewleta tirkî ewro nêşêna vera xoverdayîşê gerîlayan de bivindera. Seba ke bejayî ra nêşêna şer bikera, hewa ra hêriş kena. Ewro hêrs û nefretêko gird gerîlayan de esto. Ma do cewabêko gird bidî dişmenî. Ez veng dana heme ciwananê Kurdistanî, wa beşdarê gerîla bibî. No şerê rûmetî yo.”