Elewîyî her ser serre Aşma Mûharremî de seba xoverdayîşê Kerbela yad bikerî, 12 rojî roje tepişenî. Roja 12. de loqmeyê aşûreyî yeno viraştene û vila beno. Komîteya Şaran û Bawerîyan ya KCKyî zî bi wesîleya Aşma Mûharremî mesajêko nuştekî da.
Komîteye mesaj de vato ‘ma ê ke bi îbadetanê xo xoverdayîşê Kerbela danî cuyayene silam kenî’ û wina dewam kerdo: “Ma hêvî kenî ke rojeyê înan defterê heqî de bêro nuştene û loqmeyê ke vila bikerî bêrî qebulkerdene.”
Dewamê mesajê Komîte de wina ameyo vatene: “Rojhelato Mîyanên de xoverdayîşê ke vera zulmkaran de ameyî dayene ra yew zî Kerbela de vera Yezîdî de hetê Huseyîn û embazanê ci ra ameyo dayene. No têkoşîn hiş û ruhê azadî, seyyewbînanî û edaletî yê şaran de cayê xo girewto. Xoverdayîşê Kerbela xo ra dima mîrasêko pîroz verdayo. Ê ke fek waştişê heq û edaletî ra nêverdanî 1379 serrî yo ke roje tepişeni û loqme vila kenî. Seba ke vera zaliman de sere nêronîyayo, bîyo pîroz. Cok ra xeta Huseyînî a ya ke vera qesre û saltanatan de têkoşîn dayene ya.”
Elewîyî binê zulmê Erdogan û Bahçelîyî de yî
Komîte îzehetê xo de qala hêrişê ke roja ma ya ewroyî de benî kerda û wina vato: “Ewro îqtîdarê ke dewamê Yezîdî yî, zulmê şarê ma kenî. Seba menfîetanê qesre û saltanatan neheqî, heqaret û zalimîyan kenî. Her roje cinî, doman û extîyarî xeylê kesî yenî qetilkerdene. Wazenî sey Yezîdî ma vera înan de sere ronî. Cok ra roje roja yewbîyayîşê têkoşînê mazlûman o. Elewîyê Tirkîya zî binê zulmê Erdogan û Bahçelîyî de yî. Bi destê çeteyan mesajê qetilkerdişê Elewîyan yeno dayene. No semed ra ganî Elewîyî vera Yezîdan de têkoşîn bidî. Ma hêvî kenî ke rojeyê elewîyan defterê heqî de bêrî nuştene û loqmeyê ke vila bikerî, bêrî qebulkerdene.”
ANF / BRUKSEL