Dewleta Tirk, sûkanê Kurdistan de, sûcê merdimatî ramena. Qûwetê dewlet çarçoveyê herbê leymin de, bi fermano ke corê xo ra girotiyê, qeçek, cenî, kal û pîr, pêrokîn sivîlan kenê hedef. Wendekaran vera nê polîtîkayanê qirkerdin, verê xo açarnay hetê Kurdistan û tewrê YPS û YPS-Jin benê. Wendekaran aşkere kerdî ke, roj roja teorî niya, roja pratîkî ya’ û veng day pêrokîn wendekaran ke, vera zilmî tewrê YPS/J bibê.
Azayê YPS û YPS-Jin Cizîr, Sîlopî, Sûr, Nisêbîn de vera kerdenanê faşîst yê dewleta Tirk xoverdanê. Her ke şino tewrbiyayişê YPS û YPS-Jin beno gird. Tewr peynî de, Zangehê Stenbol ra zî xeylê wendekarî tewrê qûwetanê YPS yê Nîsêbîn bî.
Pey barîqatan de bibê jew
Wendekaran ra Alîşer Timoq’î vist vîrî ke, gencê Kurd zangehan de raştê zorvajiyan yenê û ard ziwan ke, riyê leymin-qilêrîn yê dewlet her ca de yo. Timoq’î da zonayene ke, qetlîama Enqera ey berd ewja û wina va: “Qetlîam de imbazê mi şehît kewtî, ez biya dirbetin. Bi serrano ma nê çiyan cuwyenê. Nika Kurdistan de zî eynî çî esto. Kerdenê ke Kurdistan de ramenê, merhaleyê wehşet de yê. Ez zangeh de biya, la nêşkena vera na wehşet bêveng bimana. Gerek pêrokîn gencî tewrê YPS bibê. No wezîfeyê welatparêzî, şoreşgerî û sosyalîstî yo.
Alîşer Timoqî vist vîrî ke, JOH, POH, Esedûllah çormeyê Kurdistan giroto û va, gune endî şoreşgeriya kampus biqediyo û şoreşgeriya raştîn destpa bikero. Timoqî veng da hereketê çep yê Tirkiye û va, ‘roj roja teorî niya, roja pratîk a. Gune herkes pey barîqatan de, xoverdayiş de bibo jew.
Pitikan kişenê
Wendekaran ra Baz Nisêbîn zî aşkere kerd ke, ê zereyê zilm de biyê girdî û ard ziwan ke, sîstem heqê cuwyayişî nêdano ma. Nisêbîn’î vist vîrî ke, sîstem zey potansiyelê sûcî niyadena înan û wina va: “Ma her ca de bin zilm û zorvajî de yê. Hardê Kurdistan de nika qetlîamî estê. Vera zilmê dewlet tekoşîn şert o.
Baz Nisêbîn aşkere kerd ke, gune herkes cepheyê xo zelal bikero, raya bîn çinya û wina va: “Vera zihnîyeta faşîst raya çarekerdin xoverdayişê piyayî yo. Ma dê heta çilka peynî yê goniya xo xover bidê û pey barîqatan de pirodê. Nisêbîn’î ard ziwan ke, vera tifinganê teknolojîk yê berz, îradeyê înan yê çeligîn esto. Nisebîn’î peynî de vist vîrî ke, zilm kotî de bo, şoreşger zî gerek ewja de bo.
Komalên Ciwan: Roj roja seferberî ya
Vera terora dewleta Tirk jû vengdayiş zî Kordînasyonê Komalên Ciwan ra amê. Komalên Ciwan hayr ant êrişanê qilêrîn yê dewleta Tirk ser û ard ziwan ke, roj roja seferberiya, roja xoverdayiş û şoreşî ya. Komalên Ciwan veng da gencanê Kurd yê sûkanê Tirkiye û Kurdistan ke, tewrê YPS bibê û tekoşîn biresnê serkewtiş.
DÎHA/MÊRDÎN