Hela zimistanê parinî gelek xidar vîyart. Beno ke gelek merdiman na hawa yew zimistan heyanê nika nêdîbi. No serd bêmaben da vîst roj dewam kerd. Zimistan yeno, her kes hadreyîya xo keno, baş o, wa bikero. La derê her kes dormeyê ma de heme kes hadreyîya zimistanî şêno bikero? Mesela kurdê ma yê êzîdîyî, mesela kurdê ma yê kobanêyîjî şênî no zimistano ke yeno pak û delal bivîyarnî? Derê yew qule est a ke xo tede bisetirnî? Heyanê nika perseyê înan ê zafênî safî bîyî? Beno ke heme perseyê înan safî nêbîyî. La tîya ra pey tay wextê ma mendo ke ma bikewî zimistanî. Hinî zimistan şaşî û xeletî qebul nêkeno. Eke ma nika ra vergirewtişan nêgirî ko zaf erey bibo. Beno ke no zimistan înan ra hîna xidar bivîyaro. Nika ra ma înan ser ro nêtexirîyî beno ke zaf erey bibo. Nê semedî ra ma destê xo lez bitepişî.
Destê ma ra çi yeno ma teqsîr nêkerî. Ma heme çîyê xo înan ra bar bikerî. No gure deynê mildê ma yo. Her kes goreyê qewetê xo hetkerdişê xo bikero. Keye est o eşkeno cilan ser ro, keye est o eşkeno pereyan reyde, keye est o mal û milkê xo reyde eşkeno het bido. Nê merdimê ma kure de xo setirnenî weyra ganî serûber bo. Eke mîyanê konan de ciwîyenî, konê înan nêriz bibî. Eke ê, keyeyan de ciwîyenî, keyeyanê înan germ bo yanî keyeyanê înan de îzim û komir kêmî nêbo. Ganî çar çimê ma înan ser ro bo, ma keye û kon da û ma bivajî; ‘hinî karê ma qedîyayo.’ na hawa ca ver ra dî nêbeno. Heyanê ê tîya bibî ê mêmanê ma yî û sere û çimanê ma ser ro cayê înan est o. Ê rûmet û şerefê ma yî. Ma înan ra nêewnî ma kamînan ra biewnî? Eke ma înan ra nêewnî ma nêvajî ma însan î.
Heyanê ê nêşîyî erd û herra xo, ê mêmanê ma yê erjaye yî. Ma înan ra vanî ê mêman î. Beno ke înan ra mêmanvatiş zî şaş o. Çimkî ê mêmanî ra vêşêr çendê ke ma wayîrê nê erdan î, ê zî wayîrê nê erd û herran î. Wa xo mêman nêvînî eqsî wa xo wayîrê nê erdan bivînî. Ma germî û peşmirîyayîşê xo înan ser ro kêmî nêkerî. Beno ke hem hetê pereyan de û hem zî hetê kelmel û cilan de hetkerdiş qêmî bîyo, heme çî temam bo la organîzekerdişî de perseyî bibî, o wext têmîyanî vejîyena. Nê semedî ra hem hetkerdîşî ra û hem zî organîzekerdişî ra problemî ganî nêvejîyî.
Nika ra kê organîzekerdişê zimistanî plan bikerê ke wextê zimistanî tengayî nêancî. Ma nêwazenî merdimê ma semedê serdê zimistanî ra nêweş bikewî û homa nênawno wa nêmirî zî. Ma çirê vanî vernîya ma zimistan o? Ma nêwazenî serdî ver merdimê ma bimirî. Di hîrê serran ra verê şaristanê Wanî de erdlerz bi û nê erdlerzî de gelek merdimî serdê zimistanî ver merdî. Seba naye ra eke ma vergirewtişanê xo baş bigirî o wext nê serebûtî nêbenî. Ma vergirewtişan bigirî, sewbînan ra ver ra nêdî. Hetkerdişê ma wa sey ruhê seferberî bibo.
ZERWEŞ ESNAW