Dayîka Aştîye Kûmrû Kasim Tûnça ka 21 rojî yo çalakîya roniştişî de ya, zext û tedayê dewleta Tirkî ver 25 serrî verê koçê Kampa Mexmûrî kerdo. Dayîke Tûnçe dîyar kerde ke 25 serrî verê ambargoya dewleta Tirkî mecbûr verda ke ê ca û warê xo biteriknî û wina va: “Ewro ma tîya de zî binê ambargo de yî. Heta ke ambargo bêro wedaritene, ma do çalakîya xo bidomnî.”

Kampa Mexmûrî de 12 hezar merdimî manenî û her yew wayîrê hîkayeyêko cîya yo. Labelê nuqtaya hempare ya hîkayeyê pêroyînan esta; dewleta Tirkî tedaya înan kerde, înan ser o qoricîtîye ferz kerde û dewanê înan veşnayî.

17ê Temmuze de vera endamanê îstîxbaratê dewleta Tirkî de çalakîyêk ameybî viraştene û çalakîye ra dima Kampa Mexmûrî ya bextwaştoxan ser o ambargo ameybî ronayene. Seba wedarnîyayîşê ambargo xeylê çalakîyî ameyî viraştene. Nînan ra yewe zî çalakîya dayîkan a. Dayîkê Aştîye yê Kampa Mexmûrî seba ke ambargo wedarîyo, çalakîya roniştişî de yî.

Nêverdayê ma keyeyê xo ra çîyêk bigêrê

Dayîka Aştîye Kûmrû Kasim Tûnça ke 21 roje ra nata yo seba ambargoya serê Mexmûrî bêro wedartene, verê nuqtaya kontrolî ya asayîşî ya PDKyî de çalakîya roniştişî de ya, dewa Mijinî ya Şirnêxî ra ya. Mijin yew dewa Şirnêxî ya ke bîye hedefê teda û hêrişê dewleta Tirkî.

Kûmrû Tûnçe behsa îşkenceyo ke dewleta Tirkî înan rê kerd û wina va: “Leşkerî bêmabên ameyêne dewa ma. Waştêne ke ma bibê qoricî, la dewe de çewî no qebul nêkerdêne. Înan zî seba naye îşkenceyê xo zêdeyêr kerdêne. Heta serra 1993 wina dewam kerd. A serre dewa ma ser o ambargo ameye ronayene. Seba ke ma qoricîtîye qebul nêkerde, înan nêverdayêne nan û zexîre bêro dewe. Ma heta aşma Teşrîna Peyêne îdare kerd. Badê qoricîyî ameyî û der û dorê dewa ma girewt. Ma berdî û ma ra va ‘ma do keyeyê şima bivêşnê’. Seba ke heta nika tim wina vatêne ma înan ra bawer nêkerd. La keyeyê ma vêşnayî û ma canê xo û domanê xo ancax xelisnayî. Nêverdayê ma keyeyê xo ra çîyêk bigêrê. Keyeyê ma û hacetê ma veşnayî. Mîyanê dewe de ma bêkeye mendî.”

Ma do naye zî bidê wedaritene

Tûnçe va ‘dewe de keyeyê vengî estbî, la tersî ra tehdîtanê dewleta Tirkî ra çewî keyeyê xo nêdayêne ma’ û wina dewam kerde: “Aşmêk ma çar keyeyî domananê xo reyde mîyanê dewe de mendî. Yew keyeyo merdimê mi estbi. Ma çar keyeyî şîyê kewtê o keye. Heta serra 1994î ma wina îdare kerd. Badê cû ma ameyî Mexmûr. Ma kampe kerde cenet, vera dimpiştikan ma xo ver da û kampe saz kerde. Roja ke ma ameyî tîya ra nata ma reyna binê ambargo de yê. Ma reyna zî xover danî. Heta ke ambargo nêro wedaritene ma zî tîya ra nêşinê. Senî ke ma ê ambargoyê bînî daye wedaritene, ma do  naye zî bidê wedaritene.” 

 

ANF / MEXMÛR