DBP ya ke bi sîstema hemserokîn kewt weçîntayisanê heremî yê 30ê Adare 2014î 100 ra vêşêr serokînê şaredarîyan qezenç kerd. La nika şaredar û hemşaredarê DBP bin ablûqeya hikûmeta AKP de yê. Heta nika 35 şaredarîyanê DBP amey xespkerdiş û qeyûm tayîn bi. Herzewbîn 46 hemşaredarê DBP rehîn amey giroten. Nê cayan ra yew kî Dersim o. Weçîntayisanê Heremî yê 30ê Adar 2014î de DBP sûk de %42.4 rey girewt û Mehmet Alî Bûl û Nûrhayat Altûn jê hemşaredarê sûk amey weçîntayen. 

Şaredarîya sûk ke weçîntayisanê 2004î de kewt destê BDP, weçîntayisanê heremî yê 30ê Adar 2014î de kî ravêrd DBP. BDP eve deyn û xêlê probleman CHP ra şaredarî dewr giretw. Nî 12 serran mîyan de seweta doman, cinî û pêrokîn qomî proje û xebatê hera amey ramiten. Nî projeyan ra tayî nîya yê: 

Projeyê serva cinîyan

Seweta cinîyanê Dersim hetê şaredarî xîzmetê kulturî û sosyalî amey dayene, na hetî de projeyî hadre bî. Serra 2012î de bi nameyê ‘Vengê Awe’ koroyê cinîyan ronîya. Na komî nejdîyê 8 asmî perwerdeyê zon û muzîkî dî û produksîyonê Mîr Mûltîmedîa ra albumê ‘Vengê Awe’ vete. No koro, koroyê sifteyîn yê bi kirmanckî yê cinîyan o. Emserr kî serva îstîhdamê cinîyan û ekonomîya komunal hetê Meclîsê Cinîyan yê Şaredarî bostanê sewze ronîya. Berhemê ke amey arekerden zî vilayê kesê muxtacan bî. Xozad de kî kooperatîfê cinîyan ronîya. Qezaya Dersim Pilûr de Komuna EKO-JIN ronîya û cinîyan destpa potisê nanî kerd.

Domanî zonê xo mûsîyay

Şaredarî ya ke dûştê polîtîkayanê asîmîlasyonî de kursê zonî da, heta nika bi seyan domanan perwerde kerd. Bin banê Navendê Kultur yê Gencan ke girêdayê Şaredarî yo de ser zon, kultur û hunerî 16 kursî amey dayene. Heta nika 3500 talebeyan na ca de kursê ciya dî. Emserr kî 300 talebeyî (wendekarî) kursê zey şan, temûr, gîtar, tîyatro, keman, pîyano baterî, erbane, flut, baterî, klarnet û yê zonî gênê. Nê kursan ra jew kî kursê damusnayisê zonî ser o. Bi desan domanê ke mavêna 6 û 13 serrî yê tewrê kursê kirmanckî bî. 

Projeyanê navendî ra jew kî koroyê muzîk yê domanan koma Omedya Mestû ya. Na koma ke serra 2009î de ronîya, albumê ‘Omedya Mestû’ ya bi kirmanckî vete. Emserr kî asma wusarê peyenê (Gulan) ra tepîya kî kursê semah û resîmantişî kî dest kerdî ci. Saredarîya Dersim ebi nê gureyînan, jû hetî ra zon, îtiqat û kulturî damûsnena, heta bîn ra kî vernîya raya dejenerasyon û asîmîlasyonî gêna. 

Qeyûm şarî keno mexdûr

Şaredarî herzewbîn sûk û qezayan de xêlê projeyê binawanîye ramite. Xêlê cayan de park û cayê arebîyayişê qomî virazîyay û rayîre çewt newede ra virazîyay. Herzewbîn derheqê ciwîyayişê qomî de zî hewldayenê şaredarî zaf bî. Jû hetî ra şaredarî xîzmetî berd qomî, heto bîn ra zî seba perwerdekerdiş û çarekerdişê meseleyanê înan mijûl bî. 

Rîwalê nê serkewtiş û hewldayenanê xo kî şaredarî bî hedef. Hemşaredar Nûrhayat Altûn ke verîya çend aşman rojnameyê ma ra qisey kerdbî da zonayen ke Şaredarîye DBP serva ke modelekê alternatîf ronenê hedefê AKP de yê. Altûn herzewbîn vistbi vîrî ke sebebê dişmenîya AKP ra jew kî sîstema hemserokîn yê DBP ya. 

Hikûmeta AKP hemşaredarê Dersim Nûrhayat Altûn û Mehmet Alî Bûl tepişt û hurendîya ci de Olgun Oner zey qeyûm tayîn kerd. Bi ameyişê qeyûmî ra tepya xîztemê şaredarî zî vindîyay. Oner ke şaredarî xesp kerdîyo cayo ke xîztemê qomî bikero, dest ci mexdûrkerdişê ci kerd. Onerî kesê ke tewrê nûmayişan bîye rê teblîgat ruşna û d seba her kesî 219 TL cezayê pere birna.   


 NAVENDÊ XEBERAN