Hunermendê kurd ke bi kilamanê xo yê bi kirmanckî yeno silasnayîş Mîkaîl Aslanî Amed de keyeyê huner Pale Huner de konser da. Aslanî padayîşê sazîyanê kurdan rê nêrazîbîyayîş damûsna û ard ziwan ke padayîşê sazîyan nêşkeno vernîyê hunerê şarî bigîro.
Mîkaîl Aslan ke bi serran o bi viraştişê besta kirmancî û vatişê kilamanê kirmancî yeno silasnayîş Amed de, sazîya hunerî ke fealîyetanê hunerî dana ramitene Pale Huner de bi heskerdoxanê xo ame pêhet.
Amedijan ra eleqeyêko gird
Konsero ke bi destegê Pale Hunerî virazîya rê welatijan eleqeyêko gird damûsna. Bi sebebo ke salon de ca nêmend, tayî welatijan ser payan de konser temaşe û goşdarî kerd. Aslan ke bi çepikan vejya ser sehne, kilamanê xo yê rindekî vate. Konsero ke yew saet dewam kerde de, welatijî bi dêyranê Aslanî wextêko bicoş û keyfweşt vîyarnay. Konserê Mîkaîl Aslan ke zaf weşê welatijan şi, bi kilama “Way way nîna” yê perwerdekarê erbane Şêrko Kanîwar qedîya.
Ganî şar wayîrê hunera xo bivejyo
Hunermendo namedar Aslanî konser de qisey kerd û hayr ant zext û qedexeyê vera kultur û hunera kurdî ser û ard ziwan ke teba nêşkeno vernîyê hunerê şarî bigîro. Seba hunerêka azad bîro ramiten Aslanî veng daşarî ke wayîrê hunera xo bivejyê. Mîkaîl Aslanî vist vîrî ke bi wayîrvejyayîşê şarî huner êşkena bîro îcrakerden.
Bado ke konser qedîya, welatijan seba Mîkaîl Aslanî û muzîsyenanê ci ser payan de çepikî day piro.
DÎHABER/AMED