Nezdiyê 1200 akademîsyenanê namedar ê Tirkiye û dinyayî, bi jew deklarasyonî eleqe antî terorê dewleta Tirk ser û vatibî: ‘Ma dê nêbê wertaxê sûcê dewlet’.
Akademîsyenan wastenê aştî û çareserînê demokratîk ardbî ziwan û serva-qandê muzakereyan veng daybî sermiyananê Tirk. Rayverîna Tirk cayê goş bido ena wastena aştî û çareserîni, êrişê akademîsyenan kerd.
Reîs-cûmhûrê Tirkiye Tayîp Erdogan’î î akademîsyenan hedef girot û înan tehdît kerd. Badê tehdîdanê Erdogan’î Saziyê Perwerdeyê Berz YOK û îdareyê zangehan kewtî hereket.YOK’î aşkere kerd ke, ê dê verra akademîsyenê ke desteg day deklarasyonî, çiyê lazimî bikirê.
Çormeyê faşîst kewtî hereket
Rayverînê zangehê Abdullah Gul ê Qeyserî zî, akademîsyenanê xo ra Prof. Dr. Bulent Tanjû ra wast ke îstifa bikiro. Eynî wext de faşîstê sivîl ê Qeyserî zî kewtî hereket û Prof. Tanjû tehdît kerdî.
Xeylê zangehanê bînan de zî, hem rektoran û hem zî faşîstanê sivîl, akademîsyenê ke îmze eştî binê deklarasyonê aştî, tehdît kerdî.
‘Ma peyse gam nêerzenê’
Heta bîn ra, akademîsyenê ke rastê êriş û tehdîtan amey qerardarînê xoyê serva haştî û çareserînê demokratîk ardî ziwan. Doç. Dr Bulent Kuçuk, Doç. Dr. Gaye Yilmaz, Prof. Dr. Nîlgun Toker û Prof. Dr.Cengîz Aktar’î vatenanê Erdogan’î rê nêrazîbiyenî damûsnay. Akademîsyenan ardî zon ke, iyê dhe wastena aştî û çareserînê demokratîk ra peyser gam nêerzê.Toker’î va, ez pey qiseyanê xo de ya.
Sûcdarkerdiş qebûl nêbeno
Hemserokê HDP Selahattîn Demîrtaş’î zî tehdîtanê Erdogan’î rê nêrazîbiyen damusna û vat, sûcdarkerdişê aştîwazan qebûl nêbeno. Demîrtaş‘î ard ziwan ke, gerek akademîsyenî azad bê, ne serokkomar û ne zî cayê bîn ra, ferman nêgirê.
Chomsky: Tirkiye desteg dana DAİŞ û El Nusra
Prof. Noam Chomsky zî sîteyê T24 ra, cewab da vatişanê Erdogan’î, ê zey ‘wa dûrî ra qisey nêkero, wa bîro Tirkiye, rastiyan bivîno’. Chomsky vist vîrî ke, “Tirkiye DAIŞ’a ke, Erdogan xeylê hetan ra desteg keno, sûcdar kena. Heto bîn ra El Nusra ya ke ferqê ci DAIŞ ra çinyo desteg kena.” Chomsky va: “Eynî wext de Kurdê ke, Iraq û Suriye de vera DAIŞ danê piro, lanet kenê, sûcdar kenê. Ma rewşê winayin de kes şeno çi vajo?
NAVENDÊ XEBERAN