Kongreyê 2. yê Rêxistina HDP yê Dersim de hayr anciya xoverdayişê pêroyî ser. Yardimkarê Hemserokanê HDP Nadîr Yildirim aşkere kerd ke vera cepheyê faşîzm îye dê zey Mehmet Tûnç’an vilê xo çewt nêkerê û xover bidê.
Kongreyo ke roja Şembe Salona Konferans yê Şaredariya Dersim de viraziya xêlê siyasetmedarî tewr bî. Parlamenterê HDP Alîcan Onlu, Nadîr yildirim, azayê Meclîsê Partî, Hemşaredarê Dersim ra piya xêlê welatijî hadre bî. Azaya Meclîsê Partî (MP) Mulkîye Bîrtane qiseyê akerdişî kerd û hayr ant xoverdayişê Mehmet Tûnç’an ser. Bîrtane aşkere kerd ke qiseyê Mehmet Tûnç û Sey Riza’yan reyberê ma yê û da zonayen ke xoverdayişê tarixî yê Dersim do pêrokîn Kurdistan û dinya rê bibo nimûne.
Zilm rameno
Parlamenterê sûk yê HDP Alîcan Onlu kî Qirkerdişê Ermenîyan vist vîrî û da zonayen ke qetlîam û zûlum ewro Cizîr û Sûr de rameno. Onlu vera polîtîkayanê qesr hayr ant berzkerdişê xoverdayişî ser.
Yardimkarê Hemserokanê HDP Nadîr Yildirim’î zî Kongre de qisey kerd û da zonayen ke cografyeya Kurdistan çend reynî amê veşnayen û aşkere kerd ke rexmo ke na sarî bedelê gird û giran day, la zey Sey Riza’yan ti wext vilê xo çewt nêkerd.
Yildirim’î vist vîrî ke Mehmet Tûnç’î Cizîr ra damusna ke şarî dê xoverdayiş ra fek nêviradê û va Zey Mazlûm û Îboyan, Mehmet Tûnç, Sakîne, Sêvê, Fatma û Pakîzeyan xet û terzê tekoşînî damûsnay.
Dismen ser nêkewno
Yildirim’î da zonayen ke heta ke Kurdistan de tekoşîn bibo dismen nêkewno ser û hina dewam kerd: “Tarîxê şaranê ma de jû roja bê qetlîam çinî ya. Jû roj a bê xoverdayiş zî çinî ya. Rihê azadî û xoverdayişî esto. No rih nika HDP de temsîl vîneno.”
Yardimkarê Hemserokanê HDP Yildirim’î vist vîrî ke qrîzê rejîm ke badê 7ê Hezîran Tirkîye de destpa kerd hona çareser nêbiyo û hina dewam kerd: “Weçînayişo ke bi pir îtiqatî û pir kulturî viraziya DNA yê rejîmê 90 serrî lerzna. Raştiyê rejîmo ke ser asîmîlasyon û îtiqatê şaran roniya xirab bî. Alewî, Suryanî, Ermenî, Laz, Çerkez pêrokîn şaran tekoşînê heqanê xo yê îtiqat û kamî pawitî, rejîmî kî qrîzê gird cuwya.”
Artêşê 2. yê NATO binkewt
Nadîr Yildirim’î aşkere kerd ke rejîm wazeno ke qrîzê xo bi bi herb ravêrno, nayî ra serestisê xo keno hera. Yildirim’î va, la artêşê 2. yê NATO Sûr, Cizîr, Gever, Nisêbîn de binkewt û hina qiseyê xo hina dewam kerd: “Endî tenya lejker nê, psîkologî kî rusenê. Otelanê 5 estarîn de tatîl danê. No kî damusneno ke îye biyê vila. Quwetê ke çimeyê xo heqdarî ra gênê dê vindî nêkerê, serkewê. Senî ke tarîxê dinya de pêrokîn îşgalkerdoxî şikiyayî û bî vila, ewro Kurdistan de kî şikiyenê.
Merhaleya fînalî
Yardimkarê Hemserokanê HDP qiseyanê xo de hayr ant xoverdayişê xorayirberdişan ser û vist vîrî ke rihê xorayirberdişî civakî û tekoşînê serbestî resna merhaleyekê corîn. Ma nika merhaleyê peyenîn yê tekoşînê serbestî de yê. Serbestî ra xeyrî emelê ma yê bîn çinyo. Felsefeyê ma yê cuwyayişî no wo.” Yildirim’î qiseyanê xo de hayr ant tecrîdê vera Rayverê Şarê Kurd Abdullah Ocalan’î ser kî û hina va: “Tehamulê şarê Kurd yê tecrîdê vera Ocalan’î ra nêmendo. Bi pêrokîn şar û dînamîkanê xo ma dê vera cepheyê faşîstîn tekoşînê demokrasî gird bikerime.” Yildirim’î da zonayen ke merhaleyê fînalî de hona jêde hewceyiyê rêxistinî esto.
Badê qiseyan raporê gurenayişan û malîye amey wenden. Derheqê rapor û serra newî de qisey, rexne û vernîyazî amey kerdin. Tewr peynî de rojdemê weçînayisî viraziya. Arslan Çag û Makbûle Tûlga zey hemserokê newî yê HDP yê Dersim weçîniyayî.
DÎHA/DERSIM