"Mi zerrîya xo koyan rê neqişna." Wina vatbî Gurbetellî nuşteya xo ya rojane de. Zerrîya Gurbetellî koyanî rê neqişîyaye bîye, zerrîye û bedena Gurbetellî zî heta peynîye nê koyan da mende.

Gurbetellî Ersoz; şexsiyetêka zaf giran û erjaye ya. Gurbetellî bi eslê xo Palu ra ya. Serra 1965î de dewa Zuvîyerî de dadîya xo ra bîya. Gurbetellî mektebo verên dewa xo de qedînena. La semedê averşîyayîşê xo qayîl bîye ke wendişê xo dewam bikera. Nê semedî ra babîyê Gurbetellî keynaya xo ya delale erşawit Adana. Gurbetellî nê bajarî de wendişê xo dewam kena û Unîversîteya Cukurova de beşa kîmya qedênena û badê masterî zî beşa xo de dest bi asîstanîya unîversîte kena. Nê wextan de hem wendîşê xo de serkewtêna hem zî mîyanê wendekaranan de organîzeyê kurdperwerîye kena. 

Gurbetellî hem zaf xebatkar hem zî tersê aye çinî ya. Ridê xebatenê kurdatîye ser serra 1989î de hetê dewlete ra tepîşîyena û nizdîyê di serrî zî hepisxane de manena. Badê hepîsxaneyî zî Unîversîteya Cukurova, newe ra dest pêkerdişê xebate ya Gurbetellî qebul nêkena. Dest pêkerdîşê rojnamegerî ya Gurbetellî zî na mesele ra dima dest pêkena û ramena. Heverê Adana de rojnameyê (bi nameya tirkî) Ozgur Polîtîka de xebetîyena. Badê çend aşman zî şona Stenbol. Gurbetellî rojnameyê Ozgur Polîtîka de bena mudirê pêroyî ya weşanî. Serra 1993î de polîsan êrîş benî rojnameyê Ozgur Politika ser û zafê xebatkaranê rojnameyî tepişenî û benî nezaretxane. Mîyanê nê xebatkaran de Gurbetellî zî esta. Badê hîres rojan polîsî xebatkaranê rojnameyî anî mehkema. Peynîya mehkeme de Gurbetellî û yew embaza aye endamîya rêxistine ser o benî sucdar û erzîyênî Hepisxaneyê Bayrampaşa. 

Gurbettellî nêzdîye şeş aşmî Hepisxaneyê Bayrampaşa de manena. Badê tehlîye zî reyna rojnameyê xo de xebetîyena; la zordarîya dewlete xeylek bena giran û Gurbetellî rîyê xo çarnena koyanê Kurdistanî. Serra 1995î de Gurbetellî beşdarê PKK bena. Şîyayişê xo ra ver zî şona Adana keyeyê xo; dadî, babî, waye û birayanê xo vînena û vana şima de resimê mina vesîqayin esto? Keye de vane nê çinî ya. A hel cizdanê xo ra yew resimê xo vejena û dana keyeyê xo. Aya wext heme zanenî ke Gurbetellî qerarê xo daya û şina, nêvindena. Xo ra keyeyê Gurbetellî zî xeylek welatperwer î. Birayê Gurbetellî, Orhan Ersoz yew ser cuwa ver qezaya Licê de şehîd kewtibî û eskerê Tirkîya cenazeyê Orhan û embazanê êy badê kiştişî veşnaybî. Na mesele zerrîya Gurbetellî de bena adir û her wext bi germînatîye xo manena. Nêzdîyê di serrî koyanê Kurdistanî de têkoşînê xo bi cengawerî vîyarnena û verba dişmenan şer kena. Labelê çi heyf ke serra 1997î de Kurdistanê Başûrî de mîyanê şerê germine de şehîd bena. 

Sehîd kewtişê Gurbetellî zaf rew beno. Xeylek xeyalê aye, xeylek waştenê aye estbî sey her cengawerê Kurdistanî. Gurbetellî Ersoz... Cinîya ke zerrîya xo koyan rê neqişnaya...Cinîyêka bi huyayîşê xo erd û ezman beriqnaya. Mîyanê ciwîyayîşê xo ya hirîs û di serran de bi cengawerîya xo, bi zanayîya xo, bi jîhatîya xo seba heme kurdan bîye yew finaka zaf erjîyaye. 

Vîst serre ke şehîd kewta vilike Kurdîstanê... Gurbetellî zerrîya şare kurdan de, keyeye insanetîyê girde de û rîpelanê şerefî de heta peynî her wext ciwiyena. Ma hemê, vere tekoşînê Gurbetellî û hemê şehîdanê Kurdistanî bi hûrmetî vindenî.. Ma nî Gurbetellî nî zî şehîdanê Kurdîstanî xo vîr ra nêkenî û raharê azadîye de tekoşînê şehîdan ca nêverdenî.