Qezaya Buyukada ya Stenbolî de 5ê Temmuze de 10 pawitoxê heqê merdiman ke seba kombîyayîşê ‘Ewleyî û Îdareyê Zanayîşî’ ameybî têhet, tepişîyaybî. Derheqê pawitoxanê heqê merdiman de heta nika malûmatêk nêameyo girewtiş, labelê Serekkomar Tayyîp Erdoganî derheqê nê kesan de kombîyayîşê G-20î de va ‘ê seba dewamê 15ê Temmuze ameybî têhet’.
Kesê ke ameybî tepiştiş ra Ozlem Dalkirane, Îlknur Ustune, Nalan Ekreme û Îdîl Esere Komeleya Welatîyîye ra yî. Babete ser o Endama Komeleya Welatîyîye Emel Kurmaye qisey kerde.
Kurmaye dîyar kerde ke ya nê cinîyan nizdî ra şinasnena û wina domnaye: “Nê heme cinîyî zî seba rûmet, heq û aştî xebetîyayênê. Cok ra ez seba hemînan heta peynî kefîl a. Ez bi xebitîyayîşê înan reyde sereberz a û îxtîxar kena.”
Xeyrê ci ti kesî rê çin o
Kurmaye va ‘tepişîyayîşê pawitoxê heqê merdiman xêrê ci ti kesî rê çin o’ û wina dewam kerde: “Ganî yê ke derheqê nê kesan de zuran kenî û yê ke nê zuran rê rayîr akenî, şerm bikerî. Kesê ke heqê merdiman reyde eleqeder benî tena ewro nê, vizêr zî terorîst hesibîyayênê.”
STENBOL