Înîsîyatîfê Rojnamegerê Azadan (OGÎ) raporê xo yê aşma Hezîrane aşkere kerd. OGÎye îzehetê xo de ca dayo zext û tedayê ke prosesê weçînayîşî de çapemenîya muxalîfe ser o estbî.
OGÎye raporê xo de vato ‘sere de Ajansê Anadolu û dezgeyê TRTyî ke dezgeyê dewlete yî, sey weşanê îqtîdarî hereket kerdî’ û wina domnaye: “Ajansê Anadolu ke roja weçînayîşî selahîyetê aşkerekerdişê netîceyê dîyaybî ci, netîce manîpule kerdî. Tayê dezgeyî hêrişê çapemenîya muxalîfe kerdî û raştîye girewtî binê lingan. Pirsus de keyeyê Şenyaşarî ra 3 kesî bi hawayo birîndar wedarîyabî nêweşxane û nêweşxane de bi hawayo hovane amebî qetil kerdene. Labelê hetê çapemenîya muxalîfe ra nêame dîyayene.”
OGÎye raporê xo yê Hezîrane wina aşkere kerd: “Hîna zî 192 rojnamegerî tewqîfbîyaye yî. 2 rojnamegerî tepişîyayî. 2 rojnamegerî tewqîf bîyî. 33 rojnamegerî ameyî mehkeme kerdene. 1 rojnameger rê 1041 rojî cezaya pereyî dîya. Derheqê 7 rojnamegeran de doze abîye. 3 rojnamegerî beraat kerdî û polîsî eştî buroyêkê çapemenîye ser. 70 endamê ma zî tede pêro pîya 192 rojnamegerî tewqîf bîyî. Ma veng danî wa bêrî veradayene.” n AMED