Seke yeno zanayene Ajansê Xeberan yê Firatî (ANF) ke bi çend ziwan û lehçeyan xebate kerdêne, 15ê êlule de dest bi kirmanckî xizmet dayene kerdbi. Abîyayîşê beşê kirmanckî yê ANFyî kêfweşîyêk viraşt. Babete ser o rojnamegere Canan Efe û Parlamenterê HDPyî yê Amedî Hîşyar Ozsoyî qisey kerdî.
Rojnamegere Canan Efeya ke Stêrk TVyî de programanê kirmanckîyan virazena û bi programê Ware yena naskerdene, ANF de abîyayîşê beşê kirmanckî ser o keyfweşîya xo arde ziwan. Efeye dîyar kerde ke dewleta tirkî bi qedexe û zextan vera ziwanê kurdan de wazena ke kurdan qir bikera û wina domna: “Vera nêyî de wayîrvejîyayîşê ziwanî zaf muhîm o. Coka na gama ANFyî seba ziwanê kirmanckî gamêka erjaye ya. Ma zî seba ziwanê xo çi ke ma dest ra bêro ma kenî û paştî danî na xebate. Ma seba naye ANFyî û yê ke emegê ci tede esto fîraz kenê û ci rê serkewtiş wazenî.”
Parlamenterê HDPyî Amedî Hîşyar Ozsoy zî ANF de abîyayîşê beşê kirmanckî bimbarek kerd û wina va: “No seba ziwanê dadîye zaf muhîm o. Ganî peroyê şarê ma xeberanê xo êdî beşe kirmancakî yê ANFyî ra biwanê û wayîrê ziwan û ajansê xo bivejîyê.”
ANF / BRUKSEL