Endamê Komîteya Navendî ya PKKe Cemal Şerik derheqê hêrişê topyekun ê hukimatê AKPe, xoverdayîşê ke Kurdistan de yeno meşnayîş û ravêreyeya ameyoxî de vînayîşê xo ardî ziwan.
Endamê Komîteya Navendî ya PKKe Şerik destpêka qalîkerdişê xo de sifteyîn Mehmet Tunç û Pakîze Nayir û badê zî heme şehîdê xorayîrberdiş û xoverdayîşî bi rêzdarî vîrî ard û wina verdewam kerd: “Îqtîdarê AKP û Erdoganî mîyanê îqtîdaranê şerê taybet de ê tewr averşîyaye yî. Rewşa newekerde ya 12’ê Êlule ya. Kokê îqtîdarê ci heta peynîya serrê 60’î şono. Sey partîyêke dişmenê şarî vejyaya werte. Berê heme xebatê kontrgerîlla yo. Loma polîtîkayê qirkerdişî dano meşnayîş. Yê ke eyro keno no yo; heme beşê komelî girewto hedefê xo û çimanê heme merdiman ver de qirkerdiş keno. Hêrişê heme muxalîfan keno.”
Şerik dergeyîya qalîkerdişê xo de bal ant ser bêtehemulîya Erdoganî ya dijî akademîsyen, rojnameger, tevgerê ekolojîk û muxalefetê komelkî û wina domna: “Erdogan xo rê dîktatoran finak gêno. Finak, dîktator Suharto yê Endonezya girewto xo rê. Wexto ke merdim balê xo dano gêrokê Erdoganî, merdim vîneno ke gêrokê xo welatê ke verê tede dîktatorî esto ra keno.”
Do bêro dariznayîş
Şerik ard ziwan ke çîyê ke Erdogan keno sey heqê xo vîneno û qalîkerdişê xo wina peynî kerd: “Çîyê ke Erdogan keno, sucê şerî yo û sucê dijî merdimîye yo û ganî nêro taloqkerdiş û Erdogan bêro dariznayîş. Ê ke bikî zî demokrasî û hêzê şarî yo. Ewropa û dinyaya rojawanî dijî heme qirkerdişan bêveng mendî. Seba dîktatorîya Erdogan rê firsend awan kerdî. Her çend ke Seba Dadgeha Heqê Merdiman a Ewropa sere ameyo pirodayîş zî dadgeh nêdekewta mîyanê têgêrayîşî û goreyê qanûnê xo tênêgerîyaya. Rayna her çend ke tecrîdêko şidênaye ser Rayberê Şarê Kurdî Abdullah Ocalanî esto zî CPT çîk nêkerdo. Ganî qirkerdişê ke hetê dîktatorîya AKP-Erdoganî ra yenî kerdiş, heme dinya de bêrî teşhîrkerdiş.” ANF/BEHDÎNAN
Ganî topyekun xoverdayîş bibo
Şerik vat ke têkoşînê Kurdistanî dekewto merhaleyêka newe û wina domna: “Ganî têkoşîn tena Kurdistanî ra sînordar nêmano û bêro herakerdiş. Verê têkoşînêkî cîya vernîya ma de estbi. Labelê rewşa nikayîn de no têkoşîn û xoverdayîş êdî bîyo karê şarî û hetê şarî ra yeno meşnayîş. Tena gerîlla nê, şar zî bi têkoşînê xo kewto ravêreyeyêke pêrabeste. Demo ameyoxî de yew hetî ra ganî xopawitiş bêro kerdiş, heto bîn ra zî newe ra awankerdiş rojdemî de bibo. Gerîlla sey temînatê têkoşînê şarî yo. Çalakîyê ke no zimistanî de ameyî kerdiş zî nîşan danî ke xoverdayîş do bêmaben vedewam bikero. Xoverdayîş beno ke bi raybazê cîya bêro meşnayîş. Lazim o karakterê xoverdayîşê Kurdistan û Tirkîya bêrî analîzkerdiş û ganî xoverdayîş pêrabeste bibî. Ser bingeyê neteweya demokratîk, komunalbîyîşê cuye û hembarkerdişê qadê cuye û newe ra awankerdiş wezîfeyê ma yê lezî yo.”
ANF/BEHDÎNAN