Qezaya Sûrî ya Amedî de keyeyê girîyayî binê abluqa û rijnayîş bi zext û tedayan dewam keno. Welatîyê ke keyeyanê xo nêteriknenî, keyeyê înan bi eşyayan yenî rijnayîş û reyna welatîyê ke vera rijnayîşan de vejîyenî, hetê polîsan ra yenî derbkerdiş û tepişîyenî. Keyeyê ke aşmêkî ra zafêr o ke bê awe û cereyan cuyenî, herçiqas ke zext û tedayî zaf î, reyna zî welatîyî keyeyanê xo nêteriknenî.
Heto bîn ra destûr nêdîyeno ke keyeyî eşyayanê xo vejî û eşyayê ke keyeyan ra yenî vetiş, hetê fîrmaya muteahhîtî ra yenî rotiş. Tayê keyeyê ke wazenî eşyayanê xo bivejî, labelê polîsan dîyar kerdo ke eşyayî ameyî rotiş û destûr nêdayî welatîyan. Welatîyan vera na rewşe de reaskîyon nîşan dayî û hêrsê xo nawitî.
Ekîbê rijnayîşî heta roja sêşeme wext dayî taxijan. Babete ser o taxijan ra Mehmet Ak û Azîze Akaye qisey kerdî û reaskîyon nîşan dayî.
Yê ke nêyî kenî musluman nîyî
Mehmet Ako ke keyeyê ci bi eşyayê ke mîyan de ame rijnayîş, wina va: “Sûr de keyeyî bi eşyayan yenî rijnayîş û eşyayê şarî binê enkazî de manenî. Serekkomar vano ‘birayê min o kurd’. Ma biratî na ya. Biratî keyeyê şarî sereyê înan ser de rijnayîş o? Yê ke nêyî kenî, xo ra vanî musluman. Ma muslumanî na ya?”
Akî dewamê qiseykerdişê xo de va ‘ê keyeyan mîyan de keso ke amelîyat bîbî estbî û tay mendbî ke ê keyeyî ser çar kesan de xira bikerî’ û wina dewam kerd: “Aye vîste de mi xo vist vernîya polîsan û mi va çar kesî mîyanê ê keyeyî de estî. Senî ke mi wina va, polîsan rijnayîşî vindarnayî û senî ke şîyî ewnîyayî çar kesî tede estbî. Bi no hawa her roje ma kişenî, eke ê sey heq vînenî, wa bombeyêk bierzî û hemînan bikişî. Destûr nêdanî ke ez keyeyê xo ra paca û beranê xo veja. Mi keyeyê xo nêroto, labelê mi ra vatî ke fîrmaya muteahhîtî roto. Senî çîyê ke aydê min î yenî rotiş. Ez fam nêkena. Eke wina bikerî, ez do keyeyê xo veşna.”
ANF/AMED