Parlamentere Rîelleye bale ante tecrîdo ke Ocalanî ser o yeno domnayene ser û wina va: “Ez vera tecrîdî de bêvengîya dezgehanê sey CPT, KE û PE fam nêkena. Ganî tevgerêk awan bibo û rewşa Ocalanî bibo rojeva warê mîyanneteweyî.”
SERKAN DEMÎREL / ANF / CENEVRE
Parlamentera Meclîsê Neteweyî yê Partîya Sosyalîstanê Swîsre Laurence Fehlmann Rîelleye derheqê neheqîyê ke Tirkîya de yenî cuyayene, rewşa peynîye ya Tirkîya û tecrîdo ke Rayberê Şarê Kurdî Abdullah Ocalanî ser o esto de qisey kerde û seba çareserîye rayîrî pêşnîyaz kerdî.
Rîelleye va ‘bitaybetî seba Tirkîya etirîyayîşê ma her ke şono zêde beno’ û wina domnaye: “Tirkîya de bedilnayîşê sîstemî ver her roje neheqîyî hîna zêde benî. Erdogan nika otorîteyêk awan kerdo û heme muxalefet ser o zextan keno. Ewro herkes vera rejîm û Erdoganî de sucdarêko potansîyel o. Ewro hende neheqîyî estî ke hêvîya mi ameyoxê Tirkîya ra çin a.”
Rîelleye va ‘Erdoganî weçînayîşo peyên ra dima Tirkîya de rejîmê dîktatorîye awan kerda. Çimkî êdî tena mekanîzmayêk heme qeraran gêna. Beno ke hîna meclîs esto û sîstemê dîktatorî bi temamî awan nêbîyo. Labelê hêz û mekanîzmaya qerarî ke heme çî kontrol keno, nîşaneyê nêyî yo.”
Rîelleye bale ant rolê Ewropa ser û wina va: “Ewropaye verê cû bi nameyê îslamo nerm û modernî de destek da Erdoganî. Eke Erdogan ewro wina bîyo, no het de rolê Ewropa zî zaf o. Peymanê tîcaretî, înîsîyatîfê ke dîyayî Erdoganî, peymanê bextwaştoxan û sewbîna heme çîyî hêz dayî Erdoganî. Cok ra ganî Ewropa Erdogan reyde têkilîyanê xo sînordar bikero. Ewro Tirkîya de krîzêko ekenomîk esto û ganî Ewropa seba ke Erdoganî zeyîf bikero, tayê çîyan bikero. Reyna ganî Konseyê Ewropa û Parlamentoyê Ewropa vera neheqîyê ke Tirkîya de benî de bêveng nêmanî.”
Bêvengîya nê dezgehan nîna famkerdene
Rîelleye qiseykerdişê xo de qala tecrîdo ke Ocalanî ser o esto kerd û wina va: “Ganî ewil ez vaja; rewşa Ocalanî zaf muhîm a. Ewro vera Ocalanî de bi hawayo aşkere neheqîyî benî û peymanê heqê merdiman yenî îxlalkerdene. Ocalan çareserîya problemê kurdî de aktorêko muhîm o. Ganî Ocalan zî heqê bînî ke seba hepsîyanê bînan yenî dayene ra feyde bivîno. Netîce de Ocalan hetê kurdan ra sey rayberî yeno qebulkerdene. Heqê keye û avûkatanê ci esto ke ey reyde pêvînayîşan bikerî. No tecrîd berpirsîyarîya CPT, Konseyê Ewropa (KE) û Parlamentoyê Ewropa (PE) de ya. Na nuqta de bêvengîya nê dezgehan nîna qebulkerdene.”
Wa rewşa Ocalanî biba rojeva warê mîyanneteweyî
Rîelleye peynîya qiseykerdişê xo de wina va: “Ganî seba ke bale biancîyo şertê Ocalanî ser, tevgerêko mîyanneteweyî bêro awankerdene û mîyanê ci de parlamenter, sîyasetmedar, roşnvîr û sewbîna hetî ca bigîrî. Reyna ganî çîyê ke eleqeyê medyaya mîyanneteweyî biancî bêrî kerdene. Medya muhîm a û ganî wina bikerî ke medyaya mîyanneteweyî bikewo têgêrayîşî mîyan. Bi hawayo kilme ganî rewşa Ocalanî biba rojeva warê mîyanneteweyî.”