Komîteya Bawerî û Şaran ya KCKyî û Platformê Bawerîyanê Mezopotamya derheqê aşma Remezanî de îzehetê nuştekî dayî. Komîteye vato ‘hêriş û dagîrkerîya dewleta tirk û ya Îsraîlî yewbînan ra cîyayêr nîyî’ û wina domnayo: “Ma veng danî herkesî ke wa vera Erdogan û Netanyahuyo ke Nemrud û Fîrawunê ewroyin î de bivinderî.” Komîteya Bawerî û Şaran ya KCKyî derheqê aşma Remezanî de îzehetêko nuştekî daye. Îzehetê KCKyî de ca dîyayo hêrişê ke Filistîn de dewam kenî û bale ancîyayo piştîdayîşyewbînanî ya kurd û Filistinîyan ser. Komîteye îzehetê xo de dîyar kerdo ewro yê ke xo ra vano ‘ez musluman a’ muşrîkê mekkeyijî ke zulmê kesê bawermendan kerdêne ra hîna zêde zulmê muslumanan kenî û îzehet wina domîyayo: “Nê dewlete û îqtîdarî zulm de sînor nas nêkenî û bi zorî merdiman keyeyê înan ra vejenî. Çi heyf ke muslumanî goreyê şeklî aşma Remezanî cuyenî.” Komîteye dewamê îzehetê xo de wina vato: “Alemê îslamî emser bi qetlîyam, dagîrkerîye, talan û hêrişanê Efrîn û Qudsî kewtî aşma Remezanî. Ganî heme muslumanî goreyê emrê Qurenî, şarê kurd û Filistînî reyde piştîdayîşyewbînan ronî. Goreyê ma hêriş û dagîrkerîya dewleta tirkî û ya Îsraîlî yewbînan ra qerfîyaye nîyo. Vera nê hêrişan de tena çareyêk esto, o zî girdkerdişê biratî û yewîya şaran a. Ma veng danî herkesî ke wa vera Erdogan û Netanyahuyo ke Nemrud û Fîrawunê ewroyin î de bivinderî.” Erdogan wazeno bikar bîyaro Komîteye dewamê îzehetê xo de ca dayo weçînayîşê 24ê Hezîrane û nizdîbîyayîşê Erdoganî yê weçînayîşan û wina vato: “Mabênê Tirkîya û Îsraîlî de xeylê peymanê leşkerî, îstîxbarî, ekonomîk û kulturî estî. Erdogan seba ke weçînayîşanê 24ê Hezîrane qezenç bikero, hewl dano trajedîyê şarê Filistînî bikar bîyaro. Ma veng danî muslumanê Tirkîya û şarê Îsraîlî yê hîsdarî, wa bawerîya xo propogandaya Erdogan û Netanyahuyî rê nîyarî. Reyna wa muslumanê Tirkîya destek bidî doza heqdarî ya şarê kurdî. Ma bawer kenî ke do aşma Remezanî biba wesîleya yewîya kurdan.” Wa bibo wesîleya aştîye Babete ser o Platformê Bawerîyanê Mezopotamya zî îzehetêko nuştekî da. Platformî vato ‘herçiqas ke na aşme sey aşma roje tepiştişî yena zanayîş zî, labelê tena wina nîya’ û wina domna: “Mîsyonê na aşme hîna zêde yo. Tena terbîyekerdişê nefsî nîyo, vera zalim û zulmî de wezîfeyê têkoşînî zî esto. Çimkî no têkoşîn bi sereyê xo îbadetêko dînî û merdimîye yo. Vera zulmî de vindetiş, çîyêko merdimî yo. Ganî ma vera zaliman de wezîfeyê xo bîyarî ca. Cok ra ma veng danî herkesî ke wa seba qezençkerdişê HDP û Demîrtaşî seferber bibo. Çîyê ke ewro Efrîn û Xazze de yenî kerdiş, netîceyê eynî zîhnîyetî yî. Cok ra wa heme bindestî têkoşînê xo bikerî yewe. Ma hêvî kenî ke na aşme bibo wesîleya aştî û xêrî.” ANF/BRUKSEL