GULAN AVRÊL / ANF / BEHDÎNAN
Tevgerê Azadîye her roja ke şona hîna hîra bena û her roje hetanê cîya-cîyayan ra kesê cîya-cîyayî beşdar benî. Her ciwan bi sebebanê cîya-cîyayan beşdarê têkoşînî beno û bi hawayêko bîn wazeno bi cuyêka alternatîf bicuyo û heto bîn ra zî wazeno vera sîstemî de têkoşîn bido. Nê ciwanan ra yewe zî gerîlaya cinîye Arjîne Nisêbîne ya. Arjîn Nisêbîna ke aşmêkî verê beşdarê gerîla bîybî, derheqê sebebê beşdarbîyayîşê xo û cuya gerîla de qisey kerde.
Arjîne Nisêbîne destpêkê qiseykerdişê xo de qala xeyalê xo yê gerîlatî kerde û wina va: “Mi tîya de heme sînorê xo şiknayî. Çimkî wexto ke ez ameya tîya, mi dî ke heta ê wextî mi xeylê sînorî sereyê xo de viraştbî. Cok ra cuya gerîlaye heme sînorê ke mi sereyê xo de viraştbî, şiknaye. Raşt o mi seba gerîlabîyayîşî gamêka muhîme eşt û na game seba mi destpêkêkerdişê cuya azade, kêfweşî û şabîyayîşêko gird a. No aşmêk o ez ameya tîya û ma perwede vînenî. Dersê ma yê destpêkî cuye ser o bî.”
Dîyayîş û cuyayîş zaf cîya yo
Nisêbîne bale ante ser bedilîyayîşan ser û wina va: “Bi raştî zî ez hende hîra nêfikirîyaybîya. Hende çîyê muhîmî estî ke merdim nêşeno bi vatişî biqedêno. Serê nê koyan de cuye awan kerdî, xo rêxistine kerdî û xeylê dezgehî awan kerdî. Hende zanayîş û têkoşîn de israr, hêzêko cîya hetê mi de awan keno. Merdim tîya de fam keno ke ganî merdim bibo ruhê demî. Lazim o her kes bêro tîya û xo bişinasno. Bitaybetî cinîyê ciwanî û herkes bêro sîstemî ra hesab biperso. Ya raşte bi vatiş nêbeno, dîyayîş û cuyayîş xeylê cîya yo.”
Naskerdişê Rayberîye, xo naskerdiş o
Nisêbîne qiseykerdişê xo de qala raştîya xo kerde û wina va: “Ma xo teslîmê heme çî û sîstemî kerdo. Gama ke mi na cuye dî, ez şaş bîya. Merdim vera raştîya xo de xeylê nakokîyan cuyeno. Têkoşîn û xoverdayîşê ke Rayberîye domanîya xo ra heta roja ma ya ewroyî dano meşnayîş, zaf cîya yo. Mi raştîya Rayberîye de fam kerd ke ganî merdim senî bicuyo. Nika nameyê mi Arjîne ya, yanî adirê cuye. Wexto ke ez nameyê xo goreyê raştîya Rayberîye fikirîyena, ez vana lazim o ez biba reng û raştîya cuye û ez cuye newe ra awan bikera. Naskerdişê Rayberîye, xo naskerdiş o.”Wa ciwanî verê xo bidî cuya raşte
Nisêbîne qiseykerdişê xo de qala azadîya cinîye kerde û wina va: “Sey cinîyêkî tîya de mi raştîya xo ferq kerd. Ez tîya de xeylê çîyan musaya. Bitaybetî sey cinîyêkî mi tîya de raştîya xo dî û mi fam kerd ke artêşa cinîyan newe ra cuye û estene daya awankerdiş. Hêzê pawitişê erj û kulturî cinî yo. Cok ra ganî heme ciwanî verê xo bidî waranê azadan. Ma bi hawayo baş zanî ke sîstem heme lêminîya xo û kayanê xo ciwanan ser ro dano meşnayîş. Seba hesabperskerdiş û heyfgirewtişî ganî ma zî verê xo bidî koyan. Ganî ma heme ciwanê kurdî bitaybetî zî cinîyê ciwanî verê xo bidî waranê azadan û cuya azade.”