Rayberê Şarê Kurdî Abdullah Ocalan serra 1999 ra nata binê tecrîdêko giran de yeno tepiştiş. Reyna 6 serrî yo ke birêz Ocalan nêeşkeno avûkatanê xo reyde pêvînayîş bikero. Bitaybetî 5ê nîsane 2015 ra nata zî ti zanayîş Girawa Îmrali ra nîno girewtiş.

Avûkatanê Rayberê Şarê Kurd Abdullah Ocalanî ra Nevroz Uysale derheqê tecrîdo ke Ocalanî ser de yeno meşnayîş de qisey kerde.

Avûkate Nevroz Uysale va ‘No het de ma zî 6 serrî yo ke binê tecrîdî de yî’ û qiseykerdişê xo wina domnaye: “Çimkî hetê pawitişî de ma nêeşkenî çîyêk bikerî. Waştişê ma yê pêvînayîşî yeno redkerdiş û ti bingeyê nêyî yê huqûqî zî çin o. Wazenî têkoşînê ma hetê huqûqî de bişiknî. Ganî şert û mercê ke muwekîlê mi ser de estî, bêrî wedarnayîş. Mehkemeya Heqê Merdiman yê Ewropaye (AÎHM) derheqê Girawa Îmrali de 2014 de dîyar kerdbî ke şert û mercê Girawa Îmrali bi hawayo îşkence yo.”

CPT çira nêvîneno?

Uysale va ‘her çiqas ke ma bi desan reyan muracatê CPTyî kerdbî zî heta nika ma ti cewab nêgirewto’ û wina dewam kerde: “CPT sazîya Konseyê Ewropa ya û wezîfeyê CPTyî no yo ke welatê ke endamê konseyî, ê welatan de vernîya îşkenceyan bigiro. Her çiqas ke qerarê mehkeme zî esto, CPT derheqê Girawa Îmrali de ti zanayîş nêdano û nêwazeno rewşa ke Îmrali de esta, bivîno. 28 û 29ê nîsana 2016 de CPTyî Îmrali de tayê pêvînayîşî kerdbî û vatbî ke do netîceyê pêvînayîşan îzeh bikero, la nika ma kewtî 2017 la hîna zî netîce nêameyo aşkerekerdiş. Çira no rapor nîno aşkerekerdiş?”

Tecrîd mekanîzmaya îmha yo

Uysale qiseykerdişê xo de qala etiryayîşê ke seba weşîya Ocalanî yenî hîskerdiş, kerde û dewamê qiseykerdişê xo de wina va: “Nê etiryayîşî hîna dewam kenî. Bitaybetî vatişê Ocalanî yê ‘ez pozîsyonê esîrê şerî de ya’ kilmehalê na rewşe yo. Şert û mercê ke Ocalan tede yo, mekanîzmaya îmha yo. Ma do prosesê huqûqî bişopnî. Çîyo ke heta nika bi hawayo nimite mendo, weşîya Ocalanî ya. Her çiqas ke birêz Ocalan nêyî zêde nêano ziwan zî, no vindetişê ci reyde eleqeder o. Ma heta nika qet nêresayî arşîvê weşîya ci. Ma nêzanî ke rewşa ci senîn a û doktorê ke ci ra ewnîyenî profesyonel î, an nê? Hetê ma ra do proseso huqûqî bidomîyo.”

Manaya azdîya Ocalanî esta

Uysale peynîya qiseykerdişê xo de wina va: “Hedefê ma o yo ke ma wazenî tecrîdî wedarnî û cok ra seba ma manaya azadîya Ocalanî esta. Dinya de zafaneyê probleman ancax bi azadîya Ocalanî çareser benî. Birêz Ocalan vano ‘bi hawayo rastikên prosesêko demokratîk nêbo, şexsê mi azad nêbeno.’ Cok ra azadîya birêz Ocalanî bi prosesê demokratîkbîyayîşî reyde eleqeder a. Kurdî wazenî ke wa aştîyêk rûmetin û çareserîyêka demokratîke bivirazîyo. No eynî wextî de waştişê Rayberê Şarê Kurd Abdullah Ocalanî yo zî.” 


DÎHABER / WAN