CPTyî 3 serrî ra dima reyna Îmrali zîyaret kerd. Avûkat Serbay Kokluyî derheqê zîyaretê CPTyî yê Îmrali de va ‘CPTyî netîceyê zîyaretê 2016î serra 2018 de eşkera kerdbi’ û wina dewam kerd: “Ganî CPT netîceyê zîyaretanê xo goreyê huqûqî bi hawayo rew raya pêroyî reyde pare bikero.”
YASÎN KOBULAN / MA / STENBOL
Komîteya Vernîgirewtişê Îşkenceyan ya Ewropa (CPT) eşkera kerdbî ke mabênê 6 û 17ê Gulane de Tirkîya de çend zîndanan de tayê pêvînayîşî kerdî û mîyanê nê zîndanan de Zîndanê Îmrali zî esto. Seke yeno zanayene CPT tewr peynî 2016 de Îmrali zîyaret kerdbi û netîceyê nê zîyaretî zî 2018 de eşkera kerdbi.
O wext CPTyî wina nîşan dabi ke seke Îmrali de ti problem çin o û heme çî goreyê huqûqî benî. Avûkatanê Rayberê Şarê Kurdî Abdullah Ocalanî ra Serbay Kokluyî zîyaretê CPTyî ser o qisey kerd û da zanayene ke gerek CPTyî goreyê huqûqî netîceyê zîyaretî zî raya pêroyî reyde pare bikero. Kokluyî va ‘tewr peynî Nîsana 2016 de zîyaret amebî kerdene’ û wina domna: “No tarîx ra pey Tirkîya de xeylê çîyî negatîfî bîyî. Ma nê zîyaretî bi hawayo bîyaye vînenî.”
Avûkat Kokluyî va ‘netîceyê reaksîyon û çalakîyanê grevê vêşanîye û rojeyê mergî de reyna zîyaret ame kerdene’ û wina dewam kerd: “2015 ra nata pêro pîya 4 zîyaretî ameyî kerdene. Nînan ra ya yewine 11ê Êlule de ameye kerdene. O wext zî grevê vêşanîye estbî û netîceyê grevan de zîyaret amebi kerdene. Yê dîyine zî 12ê Çileyê 2019î de virazîya. O zî netîceyê grevan de bi. Dima ra 2ê Gulane de reya hîrêyine pêvînayîş virazîya. Tewr peynî 22ê Gulane de reyna avûkatî şîyî pêvînayîş kerdî. Her 4 pêvînayîşî zî netîceyê reaksîyon û çalakîyan de bîyî. Herçiqas ke plan çinêbi zî, CPT mecbûr mend ke Îmrali zîyaret bikero.”
Neke problemî dewam kenî
Kokluyî da zanayene ke CPTyî netîceyê pêvînayîşê 2016î dima ra 20ê Adara 2018î de eşkera kerdbi û wina va: “Ya, CPT Îmrali de tayê pêvînayîşî kerdî. CPT wina kerd ke seke Îmrali de heme çî normal bo û muwekîlê ma heme heqanê xo bikar ano, nîşan da. Herçiqas ke tecrîd hende giran bibi û welat de atmosferêko giran estbi zî CPTyî netîceyê pêvînayîşan zaf erey eşkera kerdbi û no zî problemêko giran bi. Ganî CPT eynî şaşî reyna nêkero û netîceyê pêvînayîşanê xo rew raya pêroyî reyde pare bikero. Eke wina nêbo, o wext ti manaya nê pêvînayîşî nêmanena û problemî eynî hewa dewam kenî.”