2011î ra nata Rayberê Şarê Kurd Abdullah Ocalan nêşêno avûkatanê xo reyde pêvînayîş bikero. 11ê êlula 2016î ra nata zî ti xebere Ocalanî ra nîna girewtiş. 

Çend rojî verê derheqê Ocalanî de tayê xeberî ser medyaya komelkî de ameyî parekerdiş. Babete ser o her çiqas ke Serdozgerîya Komare ya Bursa û Wezîrîya Edaletî îzehet dayî zî no het de gumanê kurdan orte ra nêwedarîyayî. Cok ra çend rojî yo ke sere de Ewropa û Rojawanê Kurdistanî de û xeylê cayanê bînan de çalakîyî yenî viraştiş. Kurdî çend rojî yo ke payan ser de yî.



Koordînasyonê Partîya Azadîya Cinîyanê Kurdistanî (PAJK) derheqê ewleyî û weşîya Rayberê Şarê Kurdî Abdullah Ocalanî de îzehetêko nuştekî weşêna. 

PAJKî îzehetê xo de dîyar kerdo ke 5ê Nîsana 2015î ra nata Rayberîya înan reyde ti pêvînayîş nêameyo kerdiş û wina va: “No ters û etirîyayîşêko gird awan kerdo. Weşî, ewleyî û cuya Rayberîya ma ra CPT berpirsîyar o. Ewleyî, cuye û weşîya Rayberîya ma qaso ke nêbî babeta polîtîka, stratejîk î. Ma veng danî sazî û dezgehanê eleqederan ke wa bikewî mîyanê têgêrayîşî.”

PAJKî dewamê îzehetê xo de vato ‘ma sere de îzehetê selahîyetdaranê hukmatî, yê Amerîka û hêzanê emperyalan bi hawayo wişk şermizar kenî’ û îzehet wina dewam kerdo: “Îzehetê Konsolosxaneyê Tirkî yê Amerîka bi hawayo bêrêzî îzehet dayo, ganî kurdan ra ozrê xo biwazo. Çimkî Rayberîya ma bi têkoşînê xo yo 40 serran vera komploye de têkoşîn dayo. Çimkî komplogêran waştbî bi Komploya Mîyanneteweyî mudaxaleyê tarîxî bikerî. Bi têkoşînê Rayberîya ma bi rayberîya cinî û şarî de Rojhelato Mîyanên de welidîyayîşê azadî virazîya. Hêzê emperyalî ke nê hezim nêkerdî, bi her hawayî hêriş kenî û tehdît kenî.”


Ganî ma xover bidî

PAJKî îzehetê xo de wina vato: “Şar û tevgerê ma hêzê komplogêran baş nas kenî. Cok ra serra 99î ra nata ma vera komplo û esaretê Îmrali de têkoşîn danî. Nika komplogêrî wazenî bi hêzê xo yê leşkerî û bi organîzasyonanê kontrayan netîce bigîrî. Nê hêzî hetêkî ra DAIŞ, pêşmergeyanê Rojî û Haşdî Şabî belayê sereyê şarî kenî û bi no hawa wazenî netîceyêkî bigîrî. Ganî ma vera nê hêzan de xoverdayîşê xo aver bîşêrî.”


Wa herkes beşdar bibo

PAJKî peynîya îzehetê xo de qala girdkerdişê xoverdayîşî kerdo û wina vato: “Vera hêrişê hukmatê AKPyî de cewabo tewr baş girdkerdişê xoverdayîşî yo. Heto bîn ra ganî dewletê Ewropa û dezgehê eleqederî berpirsîyarîya xo bîyarî ca. No het de çalakîyê ke Kurdistan û Sûrîye de şarê ma, suryanî û erebî virazenî, zaf bierj î. Ganî ma dormeyê kampanyaya ke KJKyî bi şîyarê ‘Sondê ma o yo ke ma sîstemê Îmrali parçe bikerî û Rayberîya xo azade bikerî’dayo destpêkerdiş de kom bibî. Ganî bitaybetî cinî û ciwanî û herkes beşdarê çalakîyan bibo. Ancax bi azadkerdişê Rayberîye, ma şênî komploye veng bivejî. Cok ra ganî ma dormeyê Rayberîye de bibî yewe û wezîfeyê prosesî bîyarî ca.” 


ANF/ BEHDÎNAN