Ewro ez bîya şahida di meseleyan. Hurdmîn meseleyî kî zaf bi weşa mi şî. Rind o ke domanî estê. Eke ê çîn bîyêne na dinyaya qefçile se bîyamenê antene. 

Qampa Saîd xeylê cor a. Cayê xo berz o. Peyê xeylê civira ma resayme Qampa Saîd. No mabên de çamure (lincî) Qampa Saîd kî zaf a. Merdim têra şono. Erebeyî têra şonê nêvecînê. Serê şodir rew eke şima şorê şima bi şans ê. Seba ke hardî cemed gureto şima çamure ra xelesînê ra. Ma kî naye zanenîme. Aye ra ma şodir rew kewtîme raye şîme. Mabênê Mekteba Ş. Azad û cehdeyî di deqa yo. Ma di deqeyan de reştîme mektebî.

Ez keyberê karavanaya Mekteba Ş. Azad ra kewta zere. Hewayêde germî da rûyê mi ra. Bi nê hewayê germî ez bi xo hesîya ke ez çiqas cemedîya. Hewayode weş bî. Mi destûr waşt, merheba da mamosta Zêdanî û mi xo rê mîyanê şagirtan de cayode veng dî, ez şîya uca de nîşta ro. 

Dersa îngîlîzî ya. Vîst şagirtanê Mamoste Zêdanî çimî kerdê vît ey de nîyadanê. Goşî kerdê bel ey goşdar kenê. Babeta înan yewbînnaskerdîş a. Mamoste Zêdan seba ke bi înan bido famkerdene zaf cehd dano. Tayê înan zaf rew fam kenê. La tayê înan feqîra fam nêkenê. Taybet kî telafuzî de zaf zehmetî ancenê. Dersade weş a. Şagirtî çalak ê. Eke Mamoste Zêdanî înan rê rind îzah kerd peyê cû dore ameyê pratîkkerdîşî. Her rey di şagirtî wurzenê ra pratîk kenê. Mamoste Zêdanî Zeyd û Eydo pîya kerdî ra ke ey pratîk bikerê. Problemê Eydoyî çîn o. Rind telaffuz keno. La Zeyd keno nêkeno ke nêşkîno telaffuz bikero. Tayê kî şermayîno. Rûyê xo yo sîsîk bî sûr û kur. Çimê sîyayê girsî bereqînê. Mamoste Zêdanî linge êşte verê Zeydî ke îla pê bido vatene. Zêdan vano ka ti kî pey mi ra vaje. “Hello my name îs Zeyd”. Çeku bi çeku dano vatene reyna nêbeno. Gegane çekuyan rast vano la tawo ke pêroyî vano reyna nêşkîno. 

Hinî bî ke êdî mamoste Zêdan kî Zeyd kî bêzar bî. Mamoste Zêdanî êdî pes kerd ke va:

- Ka reya pêyene vaje. 

Zeyd senî ke vate guret va:

- Herro my…..

Senî ke va herro mi êdî xo nêguret. Ez huya. Tabî înan nêzana ez çi rê huyena. Ez hîna kî pey Zeydî huyena. Wa Zeyd welatê azad de azad bicuyo. 

Û pêro domanî…

Peyê perojî ma verê xo da dewa Borik. Dewa Borik taqrîben saetêk dûrê Serdêşt a. Kewena vakurê koyê Şengalî. Sereyê mi camê erebaye de ez herekyayîşî de şîya. Mi dî ke domanode hîrê serrî ya esto ya çîn o di bêçikê xo kerdê berz îşaretê serkewtene keno û ver be erebaya ma êno. Mi ca de erebaye daye vindertene. Ez bîya pîya. Mi xo resna domanî. Kerd virarda xo. Lew na hurdmîn bêçikanê ey ra. Mi raye ra dûrî fîşt û ez çerexîya erebaye. Ma raywanîya xo domnaye…