Festîvala Dêrsimî ke her serre yena viraştene, emser zî do 24 û 25ê Gulane de bêro viraştene. KCDK-E babete ser o eşkerayîyêk da û veng da herkesî ke wa beşdarê festîvale bibî. KCDK-E eşkerayîya xo de vato ‘ma do bi heme coşê xo, bi ruhê Seyîd Riza, Elîşêr û Zerîfeyan beşdarê festîvale bibî’.
KCDK-E eşkerayîya xo de wina vato: “Festîvala Dêrsimî tena festîvalêk nîya. Vera qirkerdiş de vindetişêk a. Heme aktîvîteyî seba ke heyfê Seyîd Riza, Elîşêr û Zerîfeyan bêro girewtene, yenî viraştene. Coka gerek herkes beşdar bibo. Seyîd Riza, Elîşêr û Zerîfe tena seba Koçgirî û Dêrsimî şer nêkerdî, seba Kurdîstanî şer kerdî. Ê eynî wextî de şehîdê Kurdîstanî yî. No semed ra her vîrardiş, aktîvîte û çîyê bînî ke bêrî viraştene, seba Kurdîstanî yenî viraştene.”
KCDK-E dayo zanayene ke ê na çarçewa de veng danî herkesî ke wa bi ruhê xoverdayoxî beşdarê festîvale bibî û wina qedênayo: “Ma do bi bawerîya ke hemraya ma Leyla Guvene bi siloganê ‘ma tecrîd bişiknî, faşîzmî biqedênî û Kurdîstan azad bikerî’ dana ma, beşdarê festîvale bibî.”
ANF / BRUKSEL