Kongreya Komelê Demokratîke ya Kurdistanî ya Ewropa (KCDK-E) derheqê weçînayîşê 24ê Hezîrane de îzehetêko nuştekî daye û seba pawitişê demokrasî veng daye.
KCDK-Eye îzehetê xo de vato ‘Weçînayîşê 24ê Hezîrane mabênê yê ke dîktatorî wazenî û yê ke demokrasî wazenî de yeno viraştiş’ û wina domna: “Hetêk de yê ke dîktatorîya yew kesî wazenî û heto bîn de zî yê ke demokrasî wazenî, estî. Cok ra 25ê Hezîrane de yan do dîktatorî qezenç bikero û Tirkîya biaçarno gola gonîye yan zî do demokrasî qezenç bikero û aştî û biratîye bêrî awankerdiş.”
KCDK-Eye dewamê îzehetê xo de wina vato: “Ma baş zanî ke eke 24ê Hezîrane de faşîzmê AKP û MHPyî qezenç bikero, o wext do Tirkîya vînî bikero. Cok ra weçînayîşê 24ê Hezîrane firsendêko gird o. Yê ke vera dîktatorî de yî eşkenî bêrî têhet û peynîya dîktatorîye bîyarî. Ewropa de nizdîyê 3 mîlyon weçînitoxî estî. Yanî potansîylêko gird yê weçînitoxan Ewropa de yo. Rayîrê vindarnayîşê dîktatorîye raydayîşê HDPyî yo. Ganî elewîyî zî şêrî sindoqan ser û raya xo bidî HDP. Her kurd ganî bi tesilî raya xo bikar bîyaro. Eke dîktatorîye qezenç bikero, o wext do her dewe, qeza û bajarê kurdan bêrî rijnayîş. Ewropa de bi taybetî Fransa, Almanya û Avusturya de mabênê 7 û 19ê Hezîrane de rayî yenî bikarardiş. Wa herkes şêro raya xo bido. Ganî ma seba biratî û aştîye raya xo bido HDP û dîktatorîye bivindarnî.”
ANF/BRUKSEL