Wa herkes vera dagîrkerîye de bivejîyo

EYAZ KEREM / ROJNEWS/ŞÊLADIZ

Vera hêriş û dagîrkerîya dewleta tirkî ya Başûrê Kurdistanî de ciwanan 8ê Hezîrane de Qendîl de çalakîya tirsê ganîye daybî dest pêkerdêne. Çalakîya ciwanan roja 27. de bêmabên dewam kena.

Ciwanê Şêladizî destek dayî çalakîya tirsê ganîye û reaksîyon nîşanê dagîrkerîye dayî. Ciwanan dîyar kerdî ke wa herkes vera dagîrkerîye de bivindero. Celal Rêkanîyî va ‘dewleta tirkî vera kurdan de dişmenî kena’ û wina domna: “Dagîrkerî tewr zaf hêrişê Şêladizî kenî û heta nika xeylê sîvîlî merdî. Cok ra wa herkes vengê xo berz bikero. Ma erdê xo de qatilan nêwazenî.”

Ciwanan ra Vegêr Şacîyî dîyar kerd ke netîceyê bombekerdişê dewleta tirkî de heta nika xeylê merdimê ma ameyî qetil kerdene û wina va: “AKP û Erdogan hêrişê Başûrê Kurdistanî kenî û wazenî kurdan çinî bikerî. Herçiqas ke dewleta tirkî hende hêriş keno, labelê reyna zî hukmatê Başûrî reaksîyon nîşan nêdano. Ganî vindetişê xo bibedilnî û reaksîyon nîşan bidî. Ma heta peynî destek danî çalakîya ciwanan. Wa herkes vera dagîrkerîye de bivejîyo.”