Goreyê daneyanê Komeleya Heqê Merdiman (ÎHD) zîndananê Tirkîya û yê Kurdistanî de 357ê ci giran pêro pîya hezar û 25 hepsîyê nêweşî estî. Nê hepsîyanê nêweşan ra yewe zî Selamî Keleşo ke Zîndanê Tîpa Tyî yê Duzce de maneno yo.
Unîversîteya Duzce ra raporê ‘Seba şert û mercê zîndanî eşkeno cuya xo tena sereyê xo bidomno’ dîya Keleşî. Babete ser o dayîka Keleşî Guzel Keleşe qisey kerde û vera na rewşe de reaksîyon nîşan daye.
Dayîke dîyar kerde ke ya hewteyo verên şîya pêvînayîşê lajê xo û embazanê ci lajê aye ardo pêvînayîşî û wina dewam kerde: “Goreyê aşma verêne rewşa lajê mi hîna xirabêr bîya. Wextê pêvînayîşî de lajê mi nêşênayêne sereyê xo wedarno. Embazê ci mi ra vatî ‘rewşa ci her roje hîna xirabêr bena. Roje de tewr tay 2 reyî xeriqîyeno. Çîyêko ma dest ra yeno, ma kenî. Labelê îmkanê ma zî sînordar î’. Nika tedawîya lajê mi daxî nîna kerdiş. Xora verê cû lajê mi ma nêşinasnayêne, nika rewşe hîna xirabêr bîya.”
Çira ti vejîyena televîzyonan
Dayîke va ‘ez seba rewşa lajê xo şîya hetê mudurê zîndanî’ û wina dewam kerde: “Mi ci ra va ‘ti pî yî û ez zî dayîke ya. No îşkence do key biqedîyo?’ Mudurî mi ra va ‘ez nêşêna çîyêk bikera, heta ke cezaya ci biqedîyo, tîya de yo’. Mudurî mi ra va ‘Çira ti vejîyena televîzyon û rojnameyan?’. Ez mecbûr a, lajê min o. Canê min o, qesebaya min o. Zerîya mi veşena. Wa mudurê zîndanî û Serekkomar bizano ke çiqas qesebaya mi veşena. Domanê înan zî estî. Ma wazenî wa tedawîya ci bêro kerdiş û rapor bidîyo lajê mi.”
Hepsîyê ke ameyî derbkerdiş sewq bîyî
Heto bîn ra Zîndanê Tîpa Tyî yê Wanî de OHALî ra dima neheqîyî vejîyayî dûştêko berz. Çend rojî verê hepsîyo bi nameyê Hamît Duman û yewna hepsîyo ke nameyê ci nêame musayîş, sewqê Zîndanê Wanî bîybî. Ame musayîş ke her di hepsîyî hetê bi desan gardîyanan ra ameyî derbkerdiş û her di hepsîyî badê 3 rojan neqlê nêweşxaneyî bîyî. Reyna ame musayîş ke rapor nêdîyayo hepsîyan û do keyeyê Dumanî gerreyê Wezîrîya Weşîye bikero. Heto bîn de heqê pêvînayîşî yê Dumanî ameyo astengkerdiş.
MA/EDENE-WAN