14ê Hezîrane de qezaya Pirsusî ya Riha de parlamenterê AKPyî Îbrahîm Halîl Yildiz û merdimanê ci hêrişê birayê esnafî Adil û Celal Şenyaşar kerdbî û herişî ver her di birayî birîndar bîybî û wexto ke neqlê nêweşxaneyî bîybî, amebî înfaz kerdene. Pîyê birayan Haci Esvet Şenyaşar wexto ke şîyêne nêweşxane, amebî linç kerdene û qetil kerdene. Babete ser o Emîne Şenyaşara ke 2 lajî û mêrdeyê xo vînî kerdî, qisey kerdî. Şenyaşare va ‘lajanê mi ser o guleyî varnayî û wina dewam kerde: “Pirsus de çiqas pîsatîye esta, heme hetê nînan ra yena kerdene. Dest ser nenî malê şarî û çimê înan namusê şarî de yo. Bêxera zulmî çîyêk nêdayî Pirsus. Merdiman kenî deyndarê xo û dima ra zulmê înan kenî. Xeylê kesî nînan ver întîxar kerdî. Çira înan ra kesêk nêame tepiştene û tewqîf nêbîyî? Çira ma ra kesêk tewqîf kerdî? Çira lajê mi tewqîf kerdî?” Şenyaşare dîyar kerde ke hedîse ra dima keyeyê înan vila bîyo û wina domnaye: “Keyeyê ma vila bi û ma mecbur mendî ke Pirsus ra keyeyê xo bikirêşî. Seba ke tersenî nêşênî berpirsîyaran bivejî raşte. Wina kenî ke şarê Pirsusî bitersnî. Nînan de qet wijdan çin o û ma Homayî ra zî nêtersenî? Mi nêmeyê xo dekerd binê herre. Wa ma tena nêverdî û wayîrê ma bivejyî.” MA/RIHA