Di zindanan de her ki lindanê zerrî de serrnameyî nişîneyênê hîssî tenik benê. Zey gilîya engûre ya bîyayê ya. Na zerrîtenikeyî bi arizî vinayên û eşnawştêna destvisteyanê tekoşîe erşanê netewî yê ki têkoşîna bi desena serran mîyan de vijyayê werte de dana tever.
Na zerrîtenikeyî esasê xo de çimeyê înîyê erjan, awzêmê hissanê wayirvijyayene ra zêna. Wexto ki ma,yê ki zindanan de bi no babeta erjanê şarê xo yê ki na doza firaze mîyan de vijyaye werte vînenîme lasera a şanazî nêdarena zerrî. Çimeyê îniyê zerrîtenikeyî teqeno. Na teqayene ra dejêno barî peyda beno, zey kozê adirê azadî sêneyî aqelişneno, gire de beno gozgire, beno dalpeyê sêdaranê meyweyê êdeni awdanê.
Ma dîlê ki zindanan de ge ge rewşanê winayênan vînenîme, bi zerrîtenikeya winayêna rî bi rî manenîme. Nê rewşê winayênî heman wext de benê peymitox û setoxê deraxê hissanê ma.
Giraneya vatenan
Vatenê estê ki xo mîyan de peyamanê xafilbelayî nimizenê. Vatenî estê ki kakilê ci de mijdiyani nimiteyî. Vatenî estê ki çimeyê heqîqete ra zênê, heqîqeta cuya komelkî anê ziwan, mijdayina ya degrote yê. Merdim nêzano nê vatene bimaneyî do çi mihat tîra xo zerriya merdiman de denişnê, halênê xo virazê.
Vatenî estê ki wexto ki merdim aşnaweno zerriya merdimî/e de beranî dane pê ro. Giraneya vatenan kakilê ci de nimitê ya. Bes wa merdim înan wext û ca de biyaro ziwan bixeftno.
Bernameyê TVî de temaşekerdena torinanê xodawende
Xebatkaranê ÎMC TV Qandîl de bernameyên virast bî. Virastox û pêşkêşkerdoxa vernameyî birêz Banû Guven bi heme hetiya roportaje xo bi embazanê cenîyê gerîlayana, bi torinanê xodawenda; endamanê YJA-Star a viraştbî. Cuyena torinanê xodawende ya vîst û çar seetanê gerîlayanê cenîyan hete sîyasî, cematkî, virdozî û leşkerîya girotîbî dest. Nexasim zî hazireyîyê torinanê xodawendê yê babetê 8’ê Adare, roja cenîyanê dinyayî sero kerdibî babetê vernameyê xo, dîmenê zafrengînî antibî û ma zî o cinetê cuya cemato ehlaqî, polîtîkî temaşe kerde.
Wexto ke cayê werdiş viraştene/aşpij de dîmenî antê, gerîlayanê cenîyan hem hazireyîya werdişê dihîre/nimroje yê meymanê xo verdê hem zîj pêya sohbet kerdenê.
Gerîlayanê cenî, endama YJA-Star e wexto ki amade kerde û kamera zî a antê, bi riya hiwate, zey leteyê asmiya wina vatê; “Wa maya min, min wina nêvîno.” Bi na vatena xo ya waştê vajo ki; wa maya, min bi şal û şapik, çek û rext bivîno.
Wexto ki min na vatene aşnawite û a helweste temaşe kerdi zerriya min de gireyena xilavêne ser di şî. Rewşa çinîyanê kurdan yanê çewres serran zey fîlmê sînema mi çiman ver ra ravêrd. Cenîya kurde ya ki bi heme hetiya cuyene ra merhum verdeyê bi, asmên sero çengizneyebî, çardêsan mîyan de ameyîbî hepikerdene. Ne heqê cenîyan ê vatene, ne ziwanardena giraneya zerriya xo ci desta verdeyabi. Seweta ki cenîyanê kurdan nêşayê/bese nekerdê kul û kederan, keser û lomeyanê xo biyarê ziwan, bi dê tever raştû nêweşiyanê giranan ameyê, kul û kederê xo bi xoya berdêne mezel.
Ewro roj, sayeyê awankerdox û sazûmankarê vîrdoziya xelasîya cenîyan Rayver Apoyî de, bi keda şehîdanê doza cenîyanê kurdan vejênê xo yê wayirvijyayena cuya komelkî veto werte. No vejeno ki pergala Sumeran ra nata, bi awakardena pergala hiyarerşike ra hetanî ewro, bi xirxizeya merdimê koneyî ya, xinizey û xincikanê desthilatdariya dewletdare mîyan de fetisnaya bi, bi şideya ciniya kurda ewro, newedera vijyayo werte, riyê rojî dîyo.
Cuyeya newe
Ewro roj, no vejenê cenîyakurde awankerdoxê cuyêna newê û demokratîke bîyo çimeyê îlham êheme cenîyanê têkoşeran yê dinyayî. Bi na serkewtene û destvistena xoya, cenîya kurde şexsê Sema, Berîtan, Zîlan, Sorxwîn, Arîn MÎRKAN, Rewşen û Bêrîvanan, Mizgîn û Sarayan de bîyê feriştayê netewa demokratîke, ware bi ware, welat bi welat, parzemîn bi parzemîn omidê cuya neweê vila kenê, toximê modernîteyê demokratîkî karenê. Çi heyf ki awankerdox û sazimankarê na vîrdoziya xelasiya cenîyan, çimeyê îniyê jîneolojî hewna Îmralî de, çardêsan mîyan de tik û tenîya, tecrît de cuyeno. Xelasîya awankerdoxê a myayena merdimeyî, Rayverê Şarê Kurd Abdullah Ocalanî zî do bi keda cenîyana bo. Merdim seweta na şanazeyî zeri tenik bo, hersi birijno zî erjîyaye yo, erjeno..